Ўзбекистон Республикаси Ички ишлар вазирлиги Тезкор-қидирув департаменти ҳамда Давлат хавфсизлик хизмати ходимлари томонидан ўтказилган тезкор тадбирлар давомида инсон аъзолари ва тўқималарининг ноқонуний олди-сотдиси билан шуғулланиб келган шахслар ушланди.

Аниқланишича, 1989 йилда туғилган, муқаддам Ўзбекистон Республикаси Жиноят кодексининг 277-моддаси 2-қисми (безорилик) билан судланган фуқаро турмуш ўртоғи билан олдиндан жиноий тил бириктириб, осон даромад орттириш мақсадида интернет тармоқларида инсонларда раҳм-шафқат уйғотувчи видеоларни жойлаб келган.

Тезкор суриштирувлар давомида унинг ижтимоий тармоқлар орқали инсон аъзолари ва тўқималарининг ноқонуний савдосини мунтазам йўлга қўйгани, мижозларни операция қилиш учун Душанбе шаҳридаги Истиқлол клиникасига олиб борганлиги маълум бўлди. Шунингдек, гумонланувчининг ўзига ҳам буйрак кўчириш амалиёти ўтказилгани ва бу жараёнда унга кўмаклашган шахслар аниқлангани билдирилди. Улар орасида Telegram, Instagram ва YouTube платформаларида канал юритувчи шахс ҳам бўлган.

Мазкур ҳолат юзасидан гумонланувчига нисбатан Жиноят кодексининг 133-1-моддаси 2-қисми (инсон аъзолари ва тўқималарининг олди-сотдиси) билан жиноят иши қўзғатилиб, қамоқ эҳтиёт чораси қўлланилган.

Қонунчиликка кўра, инсон аъзолари ёки тўқималарининг олди-сотдиси учун 3 йилдан 5 йилгача озодликни чеклаш ёхуд муайян ҳуқуқлардан маҳрум этган ҳолда 3 йилдан 5 йилгача озодликдан маҳрум қилиш жазоси белгиланган. Агар ушбу жиноят такроран, хавфли рецидивист томонидан ёки бир гуруҳ шахслар томонидан олдиндан тил бириктириб содир этилган бўлса, 5 йилдан 10 йилгача озодликдан маҳрум қилиш жазоси қўлланади.

• ДХХ
• ИИВ
• Жиноят