Маълумки, Мовароуннаҳрни ягона давлат сифатида бирлаштирган Соҳибқирон Самарқандни пойтахт қилиб, қудратли салтанат барпо қилган. У дунёга машҳур “Темур тузуклари” орқали давлатни бошқаришнинг ҳуқуқий асосларини белгилаган, илм-фан ва маданият ривожига беқиёс ҳисса қўшиб, Иккинчи уйғониш даври Темурийлар Ренессансини бошлаб берган.

Унинг даврида бунёд этилган бебаҳо обидалар бугун ўзбек халқининг миллий ғурури ва ўлмас тарихий мероси сифатида хизмат қилмоқда. Соҳибқироннинг “Адолат ҳар бир ишда ҳамроҳимиз ва дастуримиз бўлсин” деган ҳикматли сўзлари эса бугунги кунда Янги Ўзбекистонда олиб борилаётган ислоҳотларда яққол акс этмоқда.

Ушбу улуғ зот таваллудининг 690 йиллигини кенг нишонлаш мақсадида жорий йил 5 февраль куни Президент қарори қабул қилинди. Қарорга кўра, ҳар йили апрель ойида “Амир Темур ойлиги” эълон қилинади ва таълим муассасалари, илмий марказлар ҳамда маҳаллаларда олимлар, ёзувчи ва санъаткорлар иштирокида учрашувлар, давра суҳбатлари ва маърифий тадбирлар ўтказилади.

Қарор ижроси доирасида дунёдаги машҳур музейларнинг илғор тажрибаси асосида Темурийлар тарихи давлат музейи биноси реконструкция қилинди, замонавий жиҳозлар билан таъминланди. Рақамлаштириш орқали имкониятлари кенгайтирилиб, экспозициялари янгиланди ва хориждаги тўпламлардан харид қилинган экспонатлар билан бойитилди.

Музейнинг биринчи қаватида “Буюк Соҳибқирон – Иккинчи Ренессанс асосчиси” бўлими ташкил этилди. Иккинчи қаватда эса сунъий интеллект ва “ақлли” технологиялар асосида Амир Темур даври ва Темурийлар тарихи билан боғлиқ интерактив экспозициялар жойлаштирилди. Шу билан бирга, 3D форматдаги экспонатлар ва хариталар намойиш қилинди.

Президент Шавкат Мирзиёев музейнинг янгиланган экспозицияси ва ташриф буюрувчилар учун яратилган шароитлар билан танишар экан, аждодлар меросини ўрганиш, асраб-авайлаш ва тарғиб этишнинг нақадар муҳим эканига урғу берди.

• Амир_Темур
• Шавкат Мирзиёев