Тошкент шаҳар ИИББ хабарига кўра, жорий йилнинг 3 август куни соат 23:50 ларда Учтепа тумани ИИО ФМБ навбатчилик қисмига тумандаги “Хуршид” маҳалла фуқаролар йиғини Бешқайрағоч кўчасига ўрнатилган Paynet банкоматини ўғирлашга уриниш бўлганлиги ҳақида хабар келиб тушган.

Воқеа жойига зудлик билан етиб борган тезкор-қидирув ходимларининг тезкор суриштирув ишлари натижасида уч нафар гумонланувчи: А.Ш, Т.Ф, З.З.лар ушланган.

Маълум бўлишича, уч нафар шахс қўлқоплар, юзларини яшириш учун бош кийимлар кийиб, кулранг Tracker автомашинасининг давлат рақамларини ечиб олган ҳолда ҳаракатланишган. Воқеа жойида банкоматни кўтариб машина юкхонасига жойлаштиришга уринганда уни оғирлигидан тушириб юборишади.

Банкоматнинг тушиши натижасида юзага келган шовқин атрофдагиларнинг эътиборини тортганини сезиб, банкоматни ташлаб воқеа жойидан қочиб кетишган.

Мазкур ҳолат юзасидан Учтепа тумани ИИО ФМБ Тергов бўлими томонидан Ўзбекистон Республикаси Жиноят кодексининг тегишли моддалари билан жиноят иши қўзғатилган.

Ҳозирда тергов ҳаракатлари давом этаётгани маълум қилинган.

• ИИББ
• Тошкент
• Uchtepa