Тошкентда гиёҳвандлик моддалари савдоси учун Telegram-бот очиб, турли криптоҳамёнлар орқали 2 млн 375 минг долларлик крипто-актив айланмасини амалга оширганлар ушланди. Бу ҳақда Тошкент шаҳар ИИББ хабар берди.

Қайд этилишича, Тошкент шаҳар Ички ишлар бош бошқармаси ахборот технологиялари соҳасидаги жиноятларга қарши курашиш бошқармаси томонидан ўтказилган тезкор тадбир давомида Telegram мессенжерида ноқонуний гиёҳвандлик воситалари, уларнинг аналоглари ва психотроп моддалар савдоси учун яратилган махсус бот фош қилинган. Шунингдек, ушбу бот орқали крипто-активларни олиш, ўтказиш, айирбошлаш билан шуғулланиб келаётган шахслар аниқланган.

Ушбу ҳолат юзасидан пойтахтнинг Юнусобод туманида ўтказилган тезкор қидирув тадбирлари натижасида 1997 йил йилда туғилган А. , 2001 йилда туғилган Ш. ва Т. исмли шахслар қўлга олинган ва улар томонидан мазкур бот бошқарилиб келинаётгани аниқланган. Ўтказилган тадбир давомида 4 дона телефон, 3 дона ноутбук, 12 дона турли хилдаги банк пластик карталари, 11 дона симкарталар, қоғозга ўралган гиёҳвандлик моддалар топилиб, холислар иштирокида расмийлаштирилиб олинган.

Шунингдек, гумонланувчилар А. ҳамда Ш. нинг телефон аппарати кўздан кечирилганда хорижий ҳамда бошқа электрон криптоҳамёнлар орқали 95 мингга яқин транзаксиялар амалга оширилгани ва умумий ҳисобда 2 млн 375 минг долларга тенг бўлган миқдордаги крипто-активлар айланмаси амалга оширилгани аниқланган. Шунингдек, гумонланувчи Ш. билан ўтказилган суриштирувлар натижасида мазкур шахслар томонидан гиёҳвандлик воситалари, уларнинг аналоглари ва психотроп моддалар савдоси учун яратилган махсус канал улар томонидан бошқарилгани аниқланган.

Тезкор қидирув тадбирлари натижасида гумонланувчи А. нинг хонадони холислар билан кўздан кечирилганда, унинг яшаш манзилидан 550 дона кучли таъсир қилувчи дорилар топилган. Мазкур ҳолатлар юзасидан Жиноят кодексининг 278-8-(Крипто-активлар айланмаси соҳасидаги қонунчиликни бузиш), 243-(Жиноий фаолиятдан олинган даромадларни легаллаштириш) ва 251-1-моддалари (Гиёҳвандлик воситалари, уларнинг аналоглари ёки психотроп моддалар ҳисобланмайдиган кучли таъсир қилувчи моддаларни тарғиб қилувчи маҳсулотни тайёрлаш, тарқатиш, реклама қилиш, намойиш этиш ёки бундай моддаларни ёхуд заҳарли моддаларни қонунга хилоф равишда муомалага киритиш) билан жиноят иши қўзғатилиб, “қамоққа олиш” эҳтиёт чораси қўлланилган.

• ИИББ