Эрон олий раҳнамоси Оятуллоҳ Али Хоманаий 28 февраль куни мамлакатга қилинган ҳужумларда ҳалок бўлгани тасдиқланди. Бу ҳақда Эрон миллий телевиденияси ҳам хабар берди.

Эрон олий раҳнамоси ўлими муносабати билан мамлакатда 40 кунлик миллий мотам ва бир ҳафталик таътил эълон қилинди. Хоманаийдан ташқари Исроил ва АҚШ ҳужумлари оқибатида унинг қизи, куёви, набираси ва келини ҳам ҳалок бўлган.

Дастлаб Хоманаийнинг ўлими ҳақида Исроил оммавий ахборот воситалари хабар тарқатганди. Ўшанда Эрон ташқи ишлар вазири Аббос Ароқчи бу маълумотни рад этган. У олий раҳнамо ва мамлакат президенти Масъуд Пезешкиён тирик эканини айтган.

Шундан кейин Reuters агентлиги Исроилнинг юқори мартабали расмийсига таяниб, Хоманий ўлганини маълум қилди. АҚШ президенти Доналд Трамп ҳам ушбу маълумотни тасдиқлади.

86 ёшли Оятуллоҳ Али Хоманаий 1989 йилдан буён Эронни бошқариб келмоқда. Олий раҳбар сифатида у мамлакатда ҳокимиятнинг барча тармоқлари, шунингдек, ҳарбий ва суд тизими устидан энг юқори ваколатларга эга.

Эндиликда мамлакатни Эрон Президенти Масъуд Пезешкиён, суд ҳокимияти раҳбари Ғолям Ҳусайн Моҳсени-Эжеи ҳамда Конституция посбонлари кенгаши аъзоси бошқаради. Бу ҳақда Эроннинг Tasnim агентлиги хабар берди.

Хоманаийнинг маслаҳатчиси Муҳаммад Мохбер ҳокимиятнинг бундай тарзда ўтиши Эрон Конституциясининг 111-моддасида белгилаб қўйилганини маълум қилди.

Маълумот учун, Эрон Конституциясига кўра, Олий раҳбар вафот этган ёки ўз вазифасини бажара олмай қолган тақдирда, янги раҳбар сайлангунга қадар унинг ваколатларини юқорида номи келтирилган уч кишидан иборат Муваққат кенгаш амалга оширади.

• АҚШ
• Eron
• Havo hujumi
• Isroil