Маълум қилинишича, 26 апрелдан 12 майга қадар Тошкентда саккизинчи халқаро жазз фестивали бўлиб ўтади. Бу ҳақда Маданият ва санъатни ривожлантириш жамғармаси матбуот хизмати хабар берди.

Фестиваль ЮНЕСКОнинг Ўзбекистондаги ваколатхонаси шафелигида бутун дунёда нишонланадиган 30 апрель — Халқаро жаз кунига мўлжалланиб ўтказилади.

“ЮНЕСКО тинчлик, мулоқот ва ўзаро ҳамжиҳатликни рағбатлантириш воситаси сифатида жаз кучига ишонади, шу боис 2011 йилнинг ноябрь ойида ЮНЕСКО Бош конференцияси жаз ва унинг сайёрамизнинг барча бурчакларидаги кишиларни бирлаштиришдаги дипломатик ролига урғу бериш мақсадида 30 апрелни Халқаро жаз куни деб эълон қилган”, — дейилади жамғарма хабарида.

2024 йилда Ўзбекистонда халқаро жаз фестивали саккизинчи бор ўтказилади. Фестивалнинг барча концертлари “Ўзбекистон” халқаро анжуманлар саройи ортидаги очиқ осмон остида ўтказилади. Унга кириш бепул.

Фестиваль дастурида Франция, Германия, Индонезия, Исроил, Полша, Руминия, Украина ва Швейцариядан ташриф буюрадиган жаз ижрочилари ва гуруҳлари иштирок этади. Жамғарма таклифига биноан фестивалда Грегори Портер (АҚШ), Кенни Гарретт (АҚШ), Игор Бутман (Россия) ва бошқа мусиқачилар қатнашади.

27 апрель куни фестивалда Ўзбекистондан, ўтган йилда бўлгани каби, Жаззирама гуруҳи иштирок этади. 30 апрелда эса маҳаллий жазнинг турли авлод вакиллари ва ҳаракатларини тамсил этувчи ижрочилар иштирокидаги концерт марафони бўлиб ўтади.

Шунингдек, фестиваль дастуридан маданий мулоқот ва эркин ижодий суҳбатлар учун майдонни яратиш мақсадида Ўзбекистон мусиқачилари ва хорижий мамлакатлар вакилларини бирлаштирувчи маҳорат дарслари ўрин олган.

• фестиваль
• Fransiya
• Германия
• Isroil
• Тошкент
• Украина