Британиянинг BBC медиакорпоратсияси бош директори Тим Дейви истеъфога чиқди. Бу қарорга уни АҚШ президенти Доналд Трамп нутқининг таҳрирланган видеоси ортидан келиб чиққан можаро ундади. Мазкур материал BBC’нинг “Панорама” дастурида 2024 йилдаги АҚШ президентлик сайловлари арафасида намойиш этилган.

Дейвининг изоҳига кўра, корпорация сўнгги пайтларда бир қатор хатоларга йўл қўйган ва у раҳбар сифатида жавобгарликни зиммасига олишга қарор қилган. “Биз доимо очиқ, шаффоф ва ҳисобдор бўлишимиз керак”, — дейилади унинг ҳамкасбларга йўллаган мактубида.

Можаро The Telegraph нашри BBC эфирида намойиш этилган видеолавҳада Доналд Трампнинг 2021 йил 6 январдаги нутқидан икки турли қисмнинг монтаж қилинганини фош қилганидан сўнг бошланган. Видеода Трампнинг гўё Капитолийни босиб олишга чақириқ қилгани ҳақида таҳрирланган гаплари берилган. Аммо таҳлилларга кўра, бу икки гап ҳақиқий нутқда бир-биридан қарийб соат фарқ билан айтилган бўлган.

Масала BBC’нинг ички стандартлар бўйича маслаҳатчиси Майкл Прескотт тайёрлаган ёзма ҳужжатга асосланган. Ундаги маълумотларга кўра, эфирдаги монтаж томошабинларда Трампнинг ғазабли ҳаракатларни қўллаб-қувватлагани тўғрисида нотўғри тасаввур уйғотган. Видео монтажида, шунингдек, чиқишдан аввал ёзилган намойишчилар кадрлари ҳам қўшилган.

• Iste'fo