Францияда кузатилаётган аномал жазирама туфайли Париждаги Эйфел минорасининг баландлиги тахминан 10 сантиметрга ошди. Бу ҳақда RTL радиостанцияси муҳандис ва меъмор Бертран Лемуан маълумотларига таяниб хабар берди. Мутахассиснинг айтишича, бу ҳодиса металлнинг иссиқлик таъсирида кенгайиши билан боғлиқ. Эйфел минораси фойдаланишга топширилганида унинг баландлиги 300 метр бўлган. 2022 йилда эса унга 30 метрлик радиоантенна ўрнатилиб, умумий баландлиги 330 метрга етказилган.

“Ҳарорат минус 10 даражадан плюс 40 даражагача ўзгарганда, Эйфел минораси тахминан 10 сантиметрга узаяди. Бу ҳар 10 даража ҳарорат ўзгаришига ўртача 2 сантиметрдан тўғри келади”, — деди Бертран Лемуан. Унинг таъкидлашича, бу ўзгариш оддий кўз билан деярли сезилмайди ва ҳозирча иншоот учун ҳеч қандай хавф туғдирмайди. Бироқ узоқ йиллар давомида металлнинг мунтазам кенгайиши ва қисқариши конструкцияда кучланиш ҳосил қилиши мумкин. “Симни бир марта бурсангиз, ҳеч нарса бўлмайди.

Аммо уни юз марта бурсангиз, зўриқиш сабаб охир-оқибат узилади. Металл конструксияларда ҳам шунга ўхшаш жараён кузатилади”, — дея изоҳ берди мутахассис. Экспертнинг қайд этишича, ҳозирда Эйфел минораси тузилмасига хавф йўқ. Чунки металл фақат жуда юқори — тахминан 1500 °C ҳароратда эрийди. Сўнгги кунларда Франция ва Европанинг бошқа қатор давлатларида аномал жазирама кузатилмоқда. Айрим ҳудудларда ҳаво ҳарорати 40 °C ва ундан юқори даражага кўтарилган. Мутахассислар бундай иссиқлик тўлқинлари инсонлар саломатлиги ва инфратузилмага жиддий таъсир кўрсатиши мумкинлигидан огоҳлантирмоқда.