2026 йил 1 июлдан Ўзбекистонда фуқаролар ҳаёти, ижтимоий ҳимоя, соғлиқни сақлаш, уй-жой ва тадбиркорлик соҳаларига оид қатор муҳим ўзгаришлар кучга киради.

Пенсия ва нафақалар 7 фоизга оширилади

Президент фармонига мувофиқ, пенсиялар, нафақалар ҳамда “Ижтимоий реестр”га киритилган оилаларга болалар нафақаси ва моддий ёрдам тўловлари 7 фоизга оширилади. Ёшга доир энг кам пенсия 983 минг сўм, ногиронлик пенсиясининг энг кам миқдори 1 миллион 83 минг сўм, пенсияни ҳисоблашнинг базавий миқдори эса 504 минг сўм этиб белгиланади.

Наслдор бузоқлар учун субсидия берилади

Сунъий уруғлантириш орқали олинган ҳар бир бузоқ учун 500 минг сўм, эмбрион кўчириб ўтказиш орқали олинган бузоқ учун эса 700 минг сўм субсидия ажратилади. Шунингдек, 2029 йил 1 январгача хориждан олиб кириладиган наслдор қорамол, қўй ва эчкилар ҚҚСдан озод этилади.

Электрон тижоратда бонд омборлари тизими ишга туширилади

2026 йил 1 июлдан 2028 йил 1 июлгача ҳуқуқий эксперимент тариқасида электрон тижорат учун махсус бонд омборлари фаолияти йўлга қўйилади. Ушбу омборлар резидент ва норезидентларга электрон савдо платформалари орқали сотиладиган товарларни вақтинча сақлаш имконини беради.

Субсидия маблағларини омонатда сақлаш имконияти яратилади

Субсидия хабарномасига эга фуқаролар тижорат банкларида махсус мақсадли ипотека омонати ҳисобварағини очиб, дастлабки бадал учун ажратилган маблағларни сақлаши ва кўпайтириши мумкин бўлади.

Тошкентда “Менинг уйим” тизими жорий этилади

Пойтахтдаги кўп квартирали уйларда умумий йиғилишлар, бошқарув қарорлари, шартномалар, ҳисоботлар ва мурожаатлар фақат “Менинг уйим” электрон тизими орқали юритилади. Мазкур тартиб 2027 йилдан бошлаб бутун республика бўйлаб жорий этилади.

Коррупция ҳақида хабар берганлар ҳимоя қилинади

Коррупсиявий ҳолатлар ҳақида хабар берган шахсларга Коррупцияга қарши курашиш агентлиги томонидан ҳимоя ордери берилади. Шунингдек, “Коррупцияга қарши курашишга қўшган ҳиссаси учун” кўкрак нишони таъсис этилади.

Бепул режали стационар тиббий ёрдам йўлга қўйилади

Давлат тиббий суғуртаси тизими жорий этилган тиббиёт муассасаларида фуқаролар электрон навбат асосида бепул режали стационар даволаниш ҳуқуқига эга бўлади.

Меҳнатга лаёқатсизлик нафақаси янги тартибда тўланади

Расмий банд бўлган фуқароларга ҳомиладорлик ва вақтинча меҳнатга лаёқатсизлик нафақалари босқичма-босқич Ижтимоий ҳимоя жамғармаси томонидан тўлаб борилади.

Квартира тўловидан қарздорларга электр учун тўлов чекланади

Кўп квартирали уйларда яшовчи мулкдорлар ҳар ойнинг 15-санасигача мажбурий бадалларни тўламаса, қарздорлик бартараф этилгунга қадар электр энергияси учун тўловни амалга ошира олмайди.

Харид чеки орқали автомобиль ютиб олиш имконияти яратилади

Қорақалпоғистон Республикаси ва Хоразм вилоятида харид чекларининг “Солиқ” мобил иловаси орқали рўйхатдан ўтказилиши асосида ютуқли ўйинлар ташкил этилади. Иштирокчилар автомобиль ва бошқа совринларни ютиб олиш имкониятига эга бўлади.