Мўғул ва турк археологларидан иборат тадқиқотчилар гуруҳи Туркиянинг Онадўли ҳудудидан XIII асрда қурилган қадимий қаср харобаларини топишди. Ушбу қаср Чингизхоннинг набираси Ҳулокуга тегишли бўлиб чиқди. Сарой яқинида аҳоли вакиллари ҳаёт кечирган тураржой харобалари ҳам сақланиб қолган.

Ҳулоку хон Ҳулокуийлар давлатини бошқарган, у Кичик Осиёнинг шарқий қисмини, шунингдек замонавий Эрон, Озарбайжон, Ироқ ва Афғонистон ҳудудларини ҳам босиб олган. Тарихий ҳужжатда унинг 1261-1265 йилларда бугунги кунда Туркиянинг Ван вилояти ҳудудидаги ерларда ёзги сарой қургани қайд этилади.

Олимлар кўп йиллик изланишлар натижасида саройнинг айнан қаерда жойлашганини аниқлашга муваффақ бўлганлар. Сарой харобалари атрофидан кўплаб тарихий буюмлар ҳам топилган.

Археологларнинг фикрига кўра, Ҳулокухон саройи Қорақурум шаҳри (1220-1260 йилларда Мўғуллар империяси пойтахти) намунаси асосида қурилган. Олимлар ҳудуддан буддавийлар ибодатхонаси қолдиқлари, шунингдек Ҳулокуийлар даврига тегишли сопол буюмларни ҳам топишган.

• Тарих
• артефакт
• қизиқарли