Ўрта ер денгизининг иқлими, табиий ва тарихий диққатга сазовор жойлари Аланияни машҳур сайёҳлик масканига айлантирди. Алания оилавий дам олишни истагидагилар учун айни муддао! Чунки кенг пляжлар, болалар учун турфа хил ўйинлар ва бой маданий мероси билан у барча ёшдаги оила аъзолари учун кўнгилочар ва оромбахш таътилни ваъда қилади.

Турар жой
Аланияда оилалар учун турли хил турар жойлар мавжуд. Кўпгина меҳмонхоналар оила учун қулайликларни таклиф қилади. Болаларнинг вақтини чоғ ва мазмунли ўтказиш учун болалар клублари, сув слайдлари, ўйин майдончалари мавжуд бўлиб, уларга хурсандчилик бағишлаш мақсадида анимацион шоу каби тадбирлар ташкил этилади. Бундан ташқари, алоҳида дачалар ва ижарага олинган виллалар катта оилаларнинг ҳар турдаги эҳтиёжларини қондира оладиган идеал турар жой вариантидир.

Пляжлар ва денгиз
Алания пляжлари оилалар учун қулайлиги билан ажралиб туради. Клеопатра пляжи майин қуми ва саёз денгизи билан болалар учун хавфсиз сузиш майдонини таъминлайди. Ушбу пляжларда сув спорти, пляж ўйинлари ва оилавий қатнашиш мумкин бўлган кўплаб машғулотлар мавжуд.

Қизиқарли тадбирлар
Алания оилавий мукаммал таътил учун энг муносиб танлов десак асло муболаға бўлмайди! Аланияда оилавий ёқимли лаҳзалар ва тассуротлар тақдим этадиган қизиқарли тадбирлар ташкил этилади. Алания аквапарки болалар ва катталар кун бўйи дам олишлари мумкин бўлган сув слайдлари ва ҳовузларга бой. Бундан ташқари, Дамлаташ ғори табиий гўзалликларга ошно бўлган оилалар учун идеал экскурсия жойидир. Аланиядаги машҳур телеферик Алания қалъасига чиқиш, ҳайратланарли манзарани томоша қилиш ва тарихий қалъани яқиндан ўрганиш имконини беради.

Табиатга саёҳатлар
Аланиянинг табиий гўзалликларини кашф қилиш учун Димчайида сайр қилиши ёки Торос тоғларида жип сафарига қўшилиш мумкин. Дим ғори ва Алара шаршараси каби табиий мўъжизалар табиат ихлосмандлари учун айни муддаодир. Шунингдек, Алания атрофидаги платоларда табиат қўйнида сайр қилиш ва салқин тоғ ҳавосидан баҳраманд бўлиш мумкин.

• Туризм
• Туркия
• саёҳат