Украина ҳарбийлари Бахмут жанубидаги Клешчеевка қишлоғини озод қилганини даъво қилмоқда. Бу ҳақда Украина қуролли кучларининг 80-алоҳида ҳаво ҳужуми бригадаси хабар берди. Улар украиналик аскарларнинг тош қишлоқ черкови олдида байроқ билан тургани акс этган видеони эълон қилишди.

Қишлоқ озод қилинганини Украина Қуролли кучлари шарқий гуруҳи матбуот хизмати раҳбари, капитан Иля Евлаш ва Украина Қуролли кучлари қуруқликдаги қўшинлари қўмондони Александр Сирский ҳам тасдиқлашган.

"Биз Клешчеевка қишлоғи озод қилинганини тасдиқлаймиз. 80-алоҳида ҳаво ҳужуми бригадасининг бўлинмалари, 5-алоҳида ҳужум бригадаси, шунингдек, миллий полициянинг "Лють" қўшма ҳужум бригадаси Клешчеевкани қўлга киритди, у яна Украинаники”, – деди Евлаш.

Украина президенти Володимир Зеленский кечки нутқида ҳарбийларга қишлоқни озод қилгани учун миннатдорчилик билдирди.

Украина мудофаа вазири ўринбосари Анна Маляр ушбу операцияда 95-ҳаво ҳужуми бригадаси ҳам иштирок этганини қўшимча қилди.

Украина Президенти девонининг раҳбари Андрей Эрмак Клешчеевкада олингани айтилаётган Лють бригадаси жангчиларининг суратини “Украина ҳар доим ўзиникини қайтаради” деган сарлавҳа билан чоп этди.

Шу билан бирга, Украина Қуролли Кучлари Бош штаби Клешчеевканинг озод қилинганини ҳали расман эълон қилмаган, аммо сўнгги икки кун ичида бу соҳада сезиларли муваффақиятлар ҳақида гапирган.

• Россия
• Украина
• ozodlik