Украина Олий Радаси (парламент) президент Володимир Зеленский томонидан киритилган Россиянинг барча молия институтлари, жумладан, Марказий банкига нисбатан 50 йил муддатга чеклов чоралари тўғрисидаги қарорни маъқуллади. Бу ҳақда Рада депутати Ярослав Железняк маълум қилди.

“Парламент президентнинг Россия Федерацияси молия институтларига нисбатан иқтисодий санкциялар қўллаш тўғрисидаги фармонини қўллаб-қувватлади”, – дея ёзди Железняк ўз Телеграм каналида.

Железнякнинг сўзларига кўра, чекловлар Россияда рўйхатдан ўтган барча банкларга, шунингдек, нобанк кредит ташкилотларига, тўлов тизимлари операторларига, фонд бозори профессионал иштирокчиларига, суғурта компанияларига, инвестиция фондларига ва молия секторининг бошқа корхоналарига тааллуқли.

Қайд этиш мумкин, Украина парламенти сайтида мамлакат Миллий хавфсизлик кенгашининг ушбу чекловларни жорий этиш тўғрисидаги қарорини маъқулловчи резолюция лойиҳаси пайдо бўлди. Улар Россия Федерацияси молия институтларига тегишли бўлган активлар билан операцияларни тўхтатиб туриш, улар билан бизнес алоқаларини ўрнатиш ва битимларни тақиқлашни назарда тутади.

• Bank
• Parlament
• Россия
• Украина