Кеча, 6 май куни Сенатнинг Ахборот сиёсати ва давлат органларида очиқликни таъминлаш масалалари қўмитасида “Давлат ҳокимияти ва бошқаруви органлари фаолиятининг очиқлиги тўғрисида”ги қонуннинг Халқ таълими вазирлиги томонидан ижро этилишини ўрганиш якунлари бўйича мажлис бўлиб ўтди.

Йиғилишда очиқликни таъминлаш йўналишида вазирлик томонидан бир қанча ишлар амалга оширилгани таъкидланди.

Шу билан бирга мажлисда вазирлик, унинг таркибий ва ҳудудий бошқармалари томонидан очиқликни таъминлаш йўналишида йўл қўйилган камчиликлар танқид қилинди.

Хусусан, вазирлик 2021 йилдаги фаолиятига оид ҳисоботини жорий йил 1 апрелга қадар жамоатчилик иштирокида муҳокама қилиш учун матбуот анжуманини ўтказмаган, вазирлик фаолияти тўғрисида ахборот олишга доир сўровларни кўриб чиқишнинг умумий натижалари ҳақидаги ахборот эълон қилинмаган, вазирлик фаолиятига оид ахборотлар ахборот-кутубхона ва архив фондларига тақдим этилмаган, вазирликнинг “uzedu.uz” расмий веб-сайтини юритиш ишлари ўз холига ташлаб қўйилган.

Вазирликнинг расмий веб-сайти ҳамда очиқ маълумотлар портали (data.egov.uz)да ҳам очиқ маълумотлар эълон қилинмаган.

Жумладан, амалга оширилган давлат харидлари, давлат бюджети, давлат мақсадли жамғармалари ҳамда бюджетдан ташқари жамғармалари ҳисобига харид қилиниши режалаштирилган товарлар (ишлар, хизматлар) тўғрисидаги (харид эълон қилинишидан камида 6 ой олдин);

– давлат харидлари ва инвестиция лойиҳалари доирасида ташкил этиладиган харид комиссияларининг харид комиссияси таркибини тасдиқлаш ҳақидаги қарори;

– тасдиқланган йиллик харажатлар сметаси билан бир қаторда, унинг ижроси, шу жумладан объектларни қуриш, реконструкция қилиш ва капитал таъмирлаш ишлари, автомототранспорт воситаларини сотиб олиш ва сақлаш харажатлари;

 – хизмат уйлари ва бошқа кўчмас мулклар;

 – вазирликнинг тасдиқланган ярим йиллик ва (ёки) йиллик иш режалари;

 – вазирликка доимий фойдаланиш учун берилган ер майдонлари ва бошқа мол-мулкларни давлат-хусусий шериклик асосида олган юридик ва жисмоний шахслар каби маълумотлар очиқ маълумотлар эълон қилинмаган.

Қўмита аъзолари Халқ таълими вазирлиги томонидан ижтимоий аҳамиятга молик маълумотларни ўз муддатида эълон қилиб бориши, фаолият очиқлигини таъминлашдаги камчиликларни бартараф этиши лозимлиги қайд этилди.

Мажлис якунида Қўмитанинг тегишли қарори қабул қилинди.

• Қўмита
• Сенат
• ХТВ