29-апрель куни Қирғизистон Миллий хавфсизлик давлат қўмитасининг собиқ раҳбари Қамчибек Ташиев ўзига нисбатан жиноят иши қўзғатилгани ҳақидаги хабарлар фонида фуқароларга мурожаат қилиб, уларни қонунларга риоя қилишга ва норозилик намойишларидан тийилишга чақирди. Бу ҳақда унинг Facebook саҳифасида эълон қилинган мурожаатида маълум қилинди.

Ташиевнинг таъкидлашича, жамиятда юзага келган турли мурожаатлар ва хавотирлар сабабли у очиқ баёнот беришга мажбур бўлган.

“Ушбу жиноят иши бўйича ўзимни ҳуқуқий жиҳатдан ҳимоя қилиш учун барча имкониятларга эгаман. Мен айбсизман ва Худо хоҳласа, оқланаман”, деди у.

Шунингдек, у айбдор шахслар албатта жавобгарликка тортилишини, айбсизлар эса қонун асосида оқланишини қайд этди.

“Чунки мамлакатимизда давлат раҳбари томонидан адолатли суд тизимини шакллантириш бўйича ишлар олиб борилмоқда. Масалан, ‘Қампировод’ иши бўйича 25 киши оқланган”, дея қўшимча қилди у.

Собиқ раҳбар фуқароларни фақат қонун доирасида ҳаракат қилишга чақириб, улардан ортиқча хавотирга тушмасликни сўради.

“Мен учун хавотир олманг. Ҳаммаси яхши бўлади. Барчангизга раҳмат”, деди Ташиев.