Сайёрамизда ҳеч ким яшамайдиган ва кўчиб ўтишни хоҳламайдиган кўплаб ташландиқ жойлар мавжуд. Одатда одамлар цивилизация имкониятларининг йўқлиги ёки иш жойлари туфайли қишлоқлардан шаҳарларга кўчиб кетишади. Хитойда эса ташландиқ ҳолга келган катта шаҳарлар ҳам бор!

Хитойликлар қайси шаҳарларда яшашни хоҳлашмайди?

Кўп ҳолларда аҳоли қишлоқларни ташлаб, шаҳарларга кўчиб кетишга ҳаракат қилади. Натижада қишлоқ жойлар бўшаб қолади, мегаполислар эса аксинча, аҳоли билан тўлиб кетади. Хитойдаги баъзи шаҳарларни одамлар ташлаб чиқиб кетган, ҳеч ким бу ерларда яшашни истамайди.

Ташландиқ аҳоли пунктларига қуйидагилар киради:

• Сишуань;

• Кангбаши;

• Темза-Таун;

• ТянДучен.

Уларнинг ҳаммаси ҳам бутунлай бўш эмас, баъзиларида одамлар яшаб келишади. Лекин уларнинг сони 10 фоиздан ҳам ошмайди. Хитойликларнинг бу шаҳарларда яшашни истамасликларига бир нечта сабаблар бор.

Шаҳарларни ташландиқ ҳолатга келтирган сабаблар

Сишуан шаҳри одамлари бу ердаги об-ҳаво шароитига кўника олишмаган, чунки шаҳар чўлнинг ўртасида жойлашган. Темза-Таун хитойликларга меъморий ечимлари туфайли ёқмаган. Бу ердаги уйларнинг ҳаммаси бир қаватли қилиб қурилган. Кўп қаватли уйларда яшашга ўрганиб қолган хитойликлар бундай ўзгаришни қабул қила олишмаган.

Канбаши шаҳри жуда катта майдонга эга, бу ерда бир миллиондан кўпроқ одам яшаши мумкин. Ҳозир эса шаҳарда яшайдиган одамларнинг сони 30 000 тадан кўп эмас. Шаҳарнинг инфратузилмаси ривожланган, ҳар қандай дид эгасига мос келадиган уйлар, жумладан кўп қаватли бинолар ҳам қурилган. Лекин, шаҳарда ишсизлик муаммоси бор, шунинг учун ҳам одамлар доимий яшаш жойи сифатида ҳеч қачон бу ерни танлашмайди.

ТянДучен шаҳрини маҳаллий одамлар Хитойдаги Париж дейишади. Шаҳар архитектураси жуда чиройли, унинг шахсий Эйфель минораси ҳам бор. Лекин, тураржой нархлари жуда қиммат, шароитлар нархга яраша талабга жавоб бермайди.

Янги шаҳарларнинг жуда тез қурилиши

Хитой - иқтисодиёти ривожланган мамлакат, у янги мегаполисларни қуриш учун етарли пул маблағларига эга. Мамлакатдаги шаҳарлар шу қадар тезлик билан қуриляптики, хитойликлар янги шаҳарларга кўчиб ўтишга улгуришмаяпти.

Ташландиқ аҳоли пунктлари дунёнинг турли мамлакатларидан келган сайёҳларни ўзига жалб қилади. Шунинг учун ҳам ҳукумат арвоҳ-шаҳарларни бузиб ташлашга шошилмаяпти.

• қизиқарли
• саёҳат