Бош прокуратура ҳузуридаги Департаментнинг Мирзачўл тумани бўлими ва бошқа ҳуқуқни муҳофаза қилувчи органлар ходимлари ҳамкорлигида ўтказилган тезкор тадбирда фуқаро А.Б. 10 000 АҚШ доллари эвазига фуқаро З.И.ни гўёки юқори лавозимларда ишловчи танишлари орқали Исроил давлатига ишга юборишини айтиб, келишилган маблағдан 4 000 АҚШ долларини олган вақтида ашёвий далиллар билан ушланди.

Шунингдек, Департаментнинг Бухоро шаҳар бўлими томонидан ўтказилган тезкор тадбирда фуқаро Д.А. фуқаролар У.Р. ва А.Ж.нинг ишончига кириб, уларни гўёки хорижда яшовчи танишлари орқали ишга жойлаштириб қўйишни ваъда қилиб, Болгария ва Литва давлатларига юбориш учун виза олиб бериш эвазига 3 400 АҚШ долларини олган вақтида ушланди.

Яна бир ҳолатда, Департаментнинг Самарқанд вилояти бошқармаси томонидан ўтказилган тезкор тадбирда “S.T.” МЧЖ раҳбари О.А. фуқаро М.М.нинг ишончига кириб, уни 17 000 АҚШ доллари эвазига Исроил давлатига ишга юбориш учун “ишчи виза” расмийлаштириб беришни ваъда қилиб, олдиндан 2 000 АҚШ долларини олган вақтида ушланди.

Мазкур ҳолатлар юзасидан Жиноят кодексининг 168-моддаси (фирибгарлик) ва 211-моддаси (пора бериш) билан жиноят ишлари қўзғатилиб, тергов ҳаракатлари олиб борилмоқда.