Шавкат Мирзиёев 16 март куни Давлат солиқ қўмитасига ташриф буюрди. Бу ҳақда Президент матбуот хизмати хабар берди.

Қайд этилишича, Давлат солиқ қўмитасида Президент солиқ маъмурчилигини ислоҳ қилиш ва соҳага ахборот технологияларини кенг жорий этиш масалалари юзасидан йиғилиш ўтказган. 

Шунингдек, Солиқ қўмитаси раиси Шерзод Кудбиев солиқ кўрсаткичлари, ўзгаришлар ҳақида ахборот берган. У шунингдек, фуқароларга қайтарилаётган cashback (кешбек) тизимини реал вақт режими ва реал чекда давлат раҳбарига кўрсатиб берди ва шундай шарҳлади:

– Шу пайтгача фақат солиқчи солиқ йиққан. Тарихда биринчи марта сизнинг қарорингиз билан, январ ойидан бошлаб, одамларга кешбек қилиб қайтариб беряпмиз. Фуқаролар дўкондан олган чекини мобил илова орқали ҚР кодини сканерлаганидан сўнг, чек тизимга муваффақиятли қабул қилинади. Агар чек 52 минг сўмга урилган бўлса, 520 сўм фуқаронинг ҳамёнига тушади. Яъни, 1 фоизи қайтарилади. Одамлар энди чекни сотувчилардан ўзи талаб қилиб оляпти.  Январ ойининг ўзи учун 25 миллиард сўмдан зиёд кешбек урилган. Рад этилган чеклар ҳам бор. Агар чекларда маҳсулотнинг идентификация номери нотўғри киритилган бўлса, тизим қабул қилмайди. Бу орқали харидор кейин ўша дўконга кирмайди, ёки чек ёзган сотувчига савол беришга одатланади. 

Ўзбекистондаги ҳар бир касса энди ҚР коди бўлган чек бериши керак. Агар улар бундай чек бермаса, ёки пластикка савдо қилишни истамаса, дўконда олишиб-талашиб ўтирмай, харидор “Солиқ ҳамкор" тизими орқали ушбу тадбиркорлик субъекти ҳақида хабар бера олади, дейди Шерзод Кудбиев. 

Эслатиб ўтамиз, аввалроқ Шавкат Мирзиёев Қозоғистон президенти билан телефон орқали мулоқот қилгани ҳақида хабар берилган эди.

• ДСҚ
• Президент
• Шавкат Мирзиёев