Япониянинг Ямагата префектураси аҳолиси энди кунига камида бир марта бўлса ҳам кулишга “мажбур”. Префектура парламенти аҳоли соғлиғини мустаҳкамлаш мақсадида одамларни кунига камида бир марта кулишга чақирувчи қарорни қабул қилди.

Таъкидланишича, либерал-демократик партия ушбу қарор ташаббуси билан чиққан.

Ҳужжатда Ямагата префектураси аҳолиси жисмоний ва психологик саломатликни мустаҳкамлаш учун кунига камида бир марта кулишга чақирилган. Шунингдек, иш берувчилар иш жойларда кулгига тўла муҳит яратишга даъват этилган.

Бундай қарорга Ямагата университети тиббиёт факультети тадқиқотларига кўра келинган. Тадқиқотда тез-тез куладиган одамларда эрта ўлим хавфи камроқ экани аниқланган.

Ямагатада ҳар ойнинг 8-куни “аҳолини кулги орқали соғлиғини мустаҳкамлаш куни” деб эълон қилинди.

Ушбу қарор айрим депутатлар томонидан танқид ҳам қилинган. Улар, хусусан, касаллик ёки бошқа сабабларга кўра кулиши қийин бўлган одамларнинг ҳуқуқларини поймол қилиш мумкин эмас деб ҳисоблашини айтган. Кулиш-кулмаслик инсоннинг конституция билан кафолатланган ҳуқуқларидан бири деган, коммунист депутатлардан бири Тору Секи.

• Япония