Франсия Республикаси президенти Эммануэл Макрон Елисей саройида Ўзбекистон Республикаси президенти Шавкат Мирзиёев шарафига давлат қабул маросимини уюштирди.

Қабулда икки мамлакат расмий делегатсиялари, Франсия бош вазири Франсуа Байру бошчилигида Вазирлар Маҳкамаси аъзолари, таниқли маданият, санъат ва фан арбоблари, ишбилармон доиралар ва жамоатчилик вакиллари иштирок этди.

Ўзбекистон раҳбари Эммануэл Макрон ва унинг рафиқаси Брижит Макронга самимий қабул учун миннатдорлик билдириб, бугун бўлиб ўтган музокаралар тарихий аҳамиятга эга эканини, уларнинг натижасида мамлакатларимиз ўртасидаги муносабатлар стратегик шериклик даражасига кўтарилганини мамнуният билан қайд этди.

Франсия етакчиси бугун ўтказилган музокаралар натижаларини ва имзоланган битимларни олқишлади.

“Бир неча йил ичида биз энергетика, сув ресурсларини бошқариш, коммунал хизматлар, транспорт, барқарор туризм каби муҳим соҳаларда узоқ муддатли ҳамкорлик алоқаларини ўрнатишга эришдик. Бунинг далили сифатида Франсия ҳукумати ва Франсия тараққиёт агентлиги кўмагида франсуз компаниялари Ўзбекистонга инвеститсия киритаётгани, ҳудудларда қўшилган қиймат ва иш ўринлари яратилаётгани, ёшлар касб ўрганиб, ҳаётда ўз ўрнини топаётганини келтиришим мумкин”, – деди Эммануэл Макрон.

Томонлар халқларининг фаровонлиги йўлида Ўзбекистон-Франсия ҳамкорлигини янада мустаҳкамлашга қатъий интилишларини билдирдилар.

• Fransiya
• Макрон
• Ўзбекистон
• Президент
• Шавкат Мирзиёев