Испаниялик тажрибали мутахассис Хосе Мария Мендес Ўзбекистон футзал терма жамоасининг янги бош мураббийи этиб тайинланди. Бу ҳақда Ўзбекистон футзал ассоциацияси маълум қилди.

Хабарга кўра, ташкилот ҳамда испаниялик мураббий ўртасида икки йиллик шартнома имзоланган.

“52 ёшли мутахассис ўзбекистонлик футзал ишқибозларига яхши таниш. У аввал ҳам икки бор миллий терма жамоамизни бошқарган: 2011–2012 ҳамда 2014–2017 йилларда. Мендес раҳбарлигида Ўзбекистон терма жамоаси 2014-йилги Осиё чемпионатида бронза, 2016 йилда эса кумуш медални қўлга киритган”, – дейилади хабарда.

Хосе Мария Мендес бошқарувида Ўзбекистон футзал терма жамоаси 2016-йилги Осиё Кубогида финалга қадар етиб бориб, ўз тарихида илк бор Жаҳон чемпионатида иштирок этган.

Мураббий 1974 йил 28 март куни Испаниянинг Луго шаҳрида таваллуд топган. У футзалчилик фаолиятини “Луго” ва “Аутос Лобелле” клубларида дарвозабон сифатида бошлаган. 1996 йилда клуб бош мураббийи истеъфога чиқарилгач, раҳбарият ушбу лавозимни Мендесга таклиф қилади. Шу тариқа, у 22 ёшида мураббийлик фаолиятини бошлаган.

Мендес миллий жамоалар билан ишлаш тажрибасига ҳам эга. У 2008–2009 йилларда Таиланд, 2010 йилда эса Ветнам терма жамоасини бошқарган. Мутахассис миллий жамоа билан бир қаторда 2016–2017 йилларда мамлакат чемпиони “Ардус” клубида ҳам ишлаган.

Хабар қилинишича, Мендес Ўзбекистон ёшлар футзал терма жамоасининг шаклланишида муҳим роль ўйнаб, бир қатор иқтидорли футзалчиларни кашф этган. 2019–2026 йиллар давомида эса Мендес яна Таиландда фаолият олиб борди. Мураббийлик фаолияти давомида у Осиё Кубоги витсе-чемпиони, бронза медали совриндори, шунингдек, клублар ўртасидаги Осиё чемпионати ҳамда Осиё кубок эгалари кубоги ғолиби бўлган.

• Футзал
• Тайинлов
• УФА
• murabbiy