Кеча, 11 август куни Россия қўшинлари назоратида бўлган Запорожье атом электр станциясининг совитиш минорасида ёнғин содир бўлган. Бу ҳақда Запорожье вилоятининг босиб олинган қисмига Россия томонидан тайинланган раҳбар Евгений Балитский маълум қилди.

“Украина Қуролли кучлари томонидан Энергодар шаҳрининг ўққа тутилиши оқибатида Запорожье АЭС совитиш тизимлари иншоотида ёнғин содир бўлди”, – деб ёзди у ўзининг ижтимоий тармоқдаги саҳифасида.

Унинг таъкидлашича, АЭСнинг барча 6 та энергоблоклари ҳамон совуқ тўхташ режимида ва “буғнинг портлаши ёки бошқа оқибатлар хавфи йўқ”, шунингдек, Запорожье АЭС ва Энергодар шаҳри атрофидаги радиациявий фон нормал сақланиб қолган.

Бироқ Украина президенти Владимир Зеленский ўз Telegram каналида Запорожье атом электр станцияси биноси тепасида тутун кўтарилаётгани акс этган видео тасвирларни эълон қилди.

Украина етакчиси ёнғинни рус ҳарбийлари бошлаганини даъво қилмоқда. Шу билан бирга, унинг сўзларига кўра, АЭС ҳудудида радиация кўрсаткичлари ҳозирча нормал ҳолатда.

Украинанинг Никопол округи ҳарбий маъмурияти раҳбари Евгений Евтушенконинг ёзишича, россияликлар совитиш минорасида кўп сонли автомобиль шиналарини ёқиб юборишган.

• Россия
• Украина