Moʻgʻuliston poytaxti Ulan-Bator shahrida “Katta Dubulgʻa” turkumiga kiruvchi nufuzli turnir davom etmoqda.

Bugun umumiy mukofot jamgʻarmasi 154 00 yevroni tashkil etuvchi musobaqaning ikkinchi kungi final bellashuvlari oʻtkazildi.

-73 kg vazn toifasidagi ikkinchi bronza medali uchun kechgan bahsda Oʻzbekiston terma jamoasining ikki vakili — Shahram Ahadov va Obidxon Nomonov oʻzaro bellashishdi.

Murosasiz kechgan oʻzbekcha derbida Nomonov gʻalaba qozonib, Ulan-Bator “Katta Dubulgʻa” turnirining bronza medalini qoʻlga kiritdi.

Shuningdek, -70 kg vazn toifasidagi bronza medali uchun kechgan bahsda esa terma jamoamizning tajribali dzyudochisi Gulnoza Matniyazova qozogʻistonlik Zere Bektashkizini magʻlubiyatga uchratib, Ulan-Bator “Katta Dubulgʻa” turnirining bronza medalini qoʻlga kiritdi.

Shu tariqa, Oʻzbekiston terma jamoasi bugungi kun bahslarini 2 ta bronza medali bilan yakunladi. Jamoamiz hisobida hozircha 1 ta oltin, 2 ta bronza medali bor. 

Ertaga ogʻir vazn toifasidagi dzyudochilarimiz medallar uchun kurashga kirishadilar.

Eslatib oʻtamiz, avvalroq Diyora Keldiyorova Diyora Keldiyorova ikkinchi marta “Katta dubulgʻa” turniri gʻolibi boʻlgani haqida xabar berilgan edi.

• Dzyudo
• O‘zbekiston