“Joriy yildagi “Haj-2025” mavsumi davomida O‘zbekistondan 15 mingdan ziyod hojilarning Haj amallarini tartibli va namunali ado etishlari ta’minlandi”, – deb xabar qilmoqda “Dunyo” AA.

Mazkur tashkiliy ishlar O‘zbekiston Din ishlari bo‘yicha qo‘mita, Musulmonlar idorasi va ishchi guruhi a’zolari hamda O‘zbekistonning Saudiya Arabistonidagi elchixonasi va Jiddadagi Bosh konsulxonasi ko‘magida amalga oshirildi.

Joriy yildagi aa mavsumiga o‘zbekistonlik hojilarning Saudiya Arabistoniga borishlari 13-maydan boshlanib, 30-mayga qadar davom etdi. Shuningdek, Haj ibodatlari tugaganidan so‘ng hojilarning O‘zbekistonga qaytib ketishi 12-iyundan boshlandi. So‘nggi o‘zbekistonlik hojilar 29-iyun kuni havo qatnovlari orqali vatanga qaytishdi.

O‘zbekiston hojilariga yengillik yaratish maqsadida Saudiya Arabistonining Jidda shahridagi Podshoh Abdulaziz xalqaro aeroportidan O‘zbekistonning bir qator viloyatlariga to‘g‘ridan-to‘g‘ri aviaqatnovlar yo‘lga qo‘yildi.

O‘zbekistonlik hojilarning sog‘liqlari va sihat-salomatliklariga alohida e’tibor qaratish masalasida O‘zbekiston hukumati tomonidan barcha zarur chora-tadbirlar ko‘rilishiga qaramay, bu yilgi Haj ibodati paytida kuzatilgan jazirama natijasida va surunkali kasalligi bo‘lgan to‘rt nafar o‘zbekistonlik Saudiya Arabistonida vafot etdi.

Shuningdek, O‘zbekiston musulmonlari idorasining ogohlantirishlariga qaramay bu yilgi Haj mavsumiga noqonuniy yo‘llar bilan borgan yana to‘rt nafar hojilar ushbu mamlakatda olamdan o‘tdi.

Bundan tashqari, Haj ibodati tugaganidan so‘ng Bosh konsulxonaga 40 nafardan ziyod ziyoratchilar xorijga chiqish pasportlarini yo‘qotgani bois O‘zbekistonga qaytish guvohnomasini rasmiylashtirish uchun murojaat qilgan.

Mazkur “Haj-2025” mavsumida O‘zbekistonning Jiddadagi Bosh konsulxonasi fuqarolarga barcha zarur konsullik-huquqiy yordamni tezkorlik bilan ko‘rsatib kelmoqda.

• Haj
• O‘zbekistonlik
• ziyoratgoh