“Qishloq xo‘jaligida yerdan foydalanish samaradorligini oshirish va mahsulot yetishtirish hajmini ko‘paytirish bo‘yicha qo‘shimcha chora-tadbirlar to‘g‘risida”gi prezident qarori bilan fermerlarga bir qator imtiyozlar beriladi.

Qarorda quyidagilar maqsad qilingan:

– tuman hokimliklari tasarrufidagi bo‘sh turgan qishloq xo‘jaligi yerlarida ekin ekish va mahsulot yetishtirishni tashkil etish;

– chorvachilik uchun ozuqa ekinlar yetishtirish hajmini oshirish orqali go‘sht va sut mahsulotlari narxlarining barqarorligini ta’minlash;

– yerdan samarali foydalanishni iqtisodiy mexanizmlar orqali rag‘batlantirish, aholi bandligi va turmush darajasini oshirish.

Qarorga ko‘ra, 2025-yil hosilidan boshlab har yili paxtadan 50 sentner/gektar, g‘alladan 80 sentrner/gektardan yuqori hosil olinganini soliq hisobotlarida aks ettirgan fermer xo‘jaliklari va boshqa qishloq xo‘jaligi korxonalariga kelgusi yilda:

– ijaraga olingan jami yer maydonining 25 foiziga almashlab ekish usulida chorva uchun ozuqa, sabzavot, poliz, kartoshka, moyli va dukkakli ekinlarni ekish kafolatlanadi;

– O‘zbekiston fermerlari kengashiga a’zolik badali paxta xomashyosi bo‘yicha birjada e’lon qilinadigan boshlang‘ich narxdan va donning shakllangan o‘rtacha narxidan 0,3 foiz miqdorida belgilanadi;

– yer solig‘ini hisoblashda bazaviy stavkada nisbatan mutanosib ravishda uch karragacha kamaytiruvchi koeffitsiyentlar qo‘llaniladi.

Shuningdek, qishloq xo‘jaligi kooperativiga a’zo bo‘lgan fermer xo‘jaliklarining 50 foizidan oshmagan qismiga paxta yetishtirish uchun Qishloq xo‘jaligini davlat tomonidan qo‘llab-quvvatlash jamg‘armasining resurslari hisobidan 50 foizlik mol-mulk garovi, xususan, yerga ijara huquqi garovi bilan imtiyozli kredit ajratishga ruxsat etiladi. Bunda ushbu kredit paxta xomashyosining e’lon qilingan boshlang‘ich narxidan kelib chiqib ajratiladi.

Bundan tashqari, qishloq xo‘jaligi kooperativiga a’zo bo‘lgan fermer xo‘jaliklari yetishtirgan paxtani to‘g‘ridan-to‘g‘ri xarid qilishga ruxsat beriladi. Bunda shartnomalar O‘zbekiston tovar-xomashyo birjasi axborot portalida tuzilishi kerak.

• Soliq
• Yer
• fermer
• qishloq_xo‘jaligi