Fransiya Prezidenti Emmanuel Makron mamlakatning yangi Bosh vaziri sifatida Sebastyan Lekornyuni tayinladi.

“Reuters” axborot agentligining ma’lumotlariga ko‘ra, Sebastyan Lekornyu Makronning ko‘p yillik ittifoqchisi hisoblanadi va biznesni qo‘llab-quvvatlovchi pozitsiyaga ega. Bu esa Fransiya rahbarining biznes uchun soliqlarni kamaytirish va nafaqa yoshini oshirishga qaratilgan iqtisodiy islohotlarni davom ettirish niyatidan dalolat beradi.

Prezident Makron yangi Bosh vazirga byudjet va davlat siyosatining muhim masalalari bo‘yicha siyosiy kuchlar bilan muzokaralar o‘tkazib, kelishuvlarga erishish vazifasini yukladi.

Ma’lum qilinishicha, Lekornyu avval, Fransiya mudofaa vaziri lavozimida ishlagan. U xavfsizlik xarajatlarini oshirish va Ukrainaga Yevropa Ittifoqining qo‘llab-quvvatlash strategiyasini shakllantirishda ham faol ishtirok etgan.

Yangi hukumat oldida turgan asosiy vazifalardan biri — mamlakat moliyaviy barqarorligini ta’minlash va defitsitni kamaytirishga qaratilgan 2026-yilgi byudjet loyihasini ishlab chiqish hisoblanadi.

Eslatib o‘tamiz, 8-sentyabr kuni Fransiya Bosh vaziri Fransua Bayru parlamentdagi ovoz berish jarayonida mag‘lubiyatga uchraganidan so‘ng iste’foga chiqqan edi.

• Bosh vazir
• Fransiya
• Makron
• Prezident