Qashqadaryoda 750 dona qalbaki alkogol mahsulotlarini sotmoqchi bo‘lgan shaxs ushlandi

Qashqadaryo viloyatining G‘uzor tumanida qalbaki aksiz markali alkogol mahsulotlarini savdoga chiqarishga uringan shaxs qo‘lga olindi.

Bosh prokuratura huzuridagi Departamentning G‘uzor tuman bo‘limi va Ichki ishlar bo‘limi xodimlari hamkorligida o‘tkazilgan tezkor tadbir davomida fuqaro A.X. “Damas” rusumli avtomashinasida 3 turdagi, jami 750 dona qalbaki aksiz markali spirtli ichimliklarni Dehqonobod tumaniga olib kelayotgan vaqtida qo‘lga olingan.

Huquq-tartibot organlari ma’lumotiga ko‘ra, A.X. ushbu mahsulotlarni noqonuniy ravishda savdoga chiqarishni rejalashtirgan. Voqea joyidan barcha mahsulotlar ashyoviy dalil sifatida hujjatlashtirilgan.

Holat yuzasidan Jinoyat kodeksining 176-moddasi (qalbaki pul, aksiz markasi yoki qimmatli qog‘ozlar yasash va ularni muomalaga chiqarish) bilan jinoyat ishi qo‘zg‘atildi. Hozirda tergov harakatlari olib borilmoqda.

• Alkogol
• Qashqadaryo