NDTV xabariga ko‘ra, Nepal bo‘ylab uyushtirilayotgan norozilik namoyishlari vaqtida taxminan 25 ta qamoqxonadan 15 mingdan ortiq mahbus qochib ketgan.

Mamlakatning g‘arbiy Kailali provinsiyasi poytaxti Dhangadhida qamoqdan qochgan 692 nafar mahbusdan biri ertasi kuni o‘z ixtiyori bilan taslim bo‘lgan. U hokimiyatga navbatdagi hukumat kelgach, yana qamoqqa olinib, jazosi ikki barobar oshishidan qo‘rqqanini bildirgan. Ushbu qamoqxonada namoyishlar boshlanishidan oldin 697 nafar mahbus bo‘lgan. Tartibsizliklardan so‘ng esa faqatgina 5 nafari qolgan.

Taslim bo‘lgan mahbus 2 nafar oila a’zosi bilan birga qamoqxona eshigiga kelib, qo‘lida quroli bor xodimlarga yuzlanib, taslim bo‘lishini aytgan. Xodimlar dastlab mahbusni eshitishmagan, ammo so‘ngra uni ichkariga olishga rozilik bildirilgan. Mamlakatda namoyishlar boshlanganidan beri kamida 8 nafar mahbus xavfsizlik xodimlari bilan bo‘lgan to‘qnashuvlarda halok bo‘lgan. Qochish vaqtida qamoqxona binolari yoqib yuborilgan, darvozalar buzib tashlangan.

Mamlakatda so‘nggi kunlarda aholining yosh qatlami ishtirokida hukumatga qarshi norozilik namoyishlari uyushtirilmoqda. Ular hukumatning bir necha ijtimoiy tarmoqlarni taqiqlashiga hamda korrupsiyaga qarshi norozilik bildirmoqda. Shu sabab bosh vazir KP Sharma Oli 9-sentyabr kuni iste’fo berishga majbur bo‘lgan.

Nepal armiyasi 11-sentyabr kuni taxminan 200 nafar mahbusni yana qo‘lga olgan, biroq minglab qochqinlar hali ham ozodlikda yuribdi. Tinchlik o‘rnatish uchun armiyaga va politsiyaga katta qiyinchiliklar tug‘ilmoqda. Bundan tashqari, “Z avlod inqilobi” deb nom olgan norozilik namoyishlarida Hilton mehmonxonasi butunlay yoqib yuborilgan.

• Namoyish
• Nepal