Eron Isroilning Mossad razvedka xizmati foydasiga josuslik qilganlikda ayblangan erkakni qatl etdi. Bu haqda Iran International xabar bermoqda.

Ushbu shaxs 2025-yilning aprel oyida hibsga olingan bo‘lib, Isroil foydasiga josuslik qilganlikda ayblangan. U Isroilga Eronning raketa obyektlarida diversiyalar uyushtirishga yordam berishi mumkin bo‘lgan uskunalarni xarid qilganlikda gumon qilingan. Tergov ma’lumotlariga ko‘ra, u portlovchi moddalar o‘rnatilgan avtomobillarda harakatlangan.

Eron uzoq vaqtdan buyon Isroilni yadro obyektlariga qarshi diversiyalar uyushtirishda va eronlik olimlarni o‘ldirishda ayblab keladi.

O‘tgan yilning dekabr oyida Eronda iqtisodiy vaziyat sabab yirik namoyishlar boshlangandi. Eron rasmiylari ushbu noroziliklarni AQSh va Isroil bilan bog‘lagandi. Namoyishlar qat’iy bostirilgan fonida AQSh Prezidenti Donald Tramp Eronga yirik harbiy zarba berish va davlat yaqiniga qo‘shin joylashtirish bilan tahdid qilgan. 16-yanvar kuni Tramp bunday rejadan voz kechganini va bunga 800 nafar mahkumning qatl etilishi bekor qilingani sabab bo‘lganini aytgan edi.

2025-yil iyunda Eron rasmiylari josuslikda ayblangan uch kishini qatl etgan, ular diversiya uchun mo‘ljallangan uskunalarni spirtli ichimliklar ko‘rinishida olib kirishga uringanlikda ayblangandi.

Ma’lumot uchun, Eronda 2025-yil kamida 1500 (47 foizi giyohvand moddalar bilan bog‘liq jinoyatlar uchun) kishi qatl etgan.

• Eron
• Isroil