Ijtimoiy tarmoqlar orqali maktablarda an’anaviy (qog‘oz) kundaliklar, sinf jurnallari joriy etilayotganligi haqida xabarlar tarqaldi. Maktabgacha va maktab ta’limi vazirligi ushbu xabarlar yuzasidan rasmiy bayonot berdi.

O‘zbekiston Respublikasi Prezidentining 2018-yil 5-sentabrdagi 3931-sonli qarori hamda 2019-yil 29-apreldagi 5712-son Farmoniga asosan ayni vaqtda mamlakatdagi mavjud barcha umumta’lim maktablari o‘quvchilarining davomati va fanlarni o‘zlashtirish baholari “eMaktab” elektron jurnal tizimi orqali amalga oshirilib kelinmoqda.

“Bundan ko‘zlangan maqsad, o‘qituvchilardagi ish yuklamasini kamaytirish, o‘quv jarayonini tashkil etishda zamonaviy axborot-kommunikatsiya texnologiyalarini joriy etishdan iborat. Ushbu jarayon xalqaro tajribada ham o‘zini oqlagan.

Mazkur tizim joriy etilishi natijasida ota-onalarning o‘z farzandlarining darslarni o‘zlashtirish darajasini masofaviy kuzatish imkoniyati yaratilib, o‘quvchilarni baholashda shaffoflik ta’minlanib kelinmoqda. Shuningdek, pedagoglar faoliyatiga doir turli qog‘ozbozliklarning kamayishiga erishildi”, – deyiladi Maktabgacha va maktab ta’lim vazirligi munosabatida.

Xabarda qo‘shimcha qilinishicha, Maktabgacha va maktab ta’limi vazirligi tomonidan O‘zbekiston maktablariga an’anaviy kundalik va sinf jurnallariga qaytish bo‘yicha topshiriq berilmagan.