Ichki ishlar vazirligi matbuot xizmati xabariga ko‘ra, Toshkent shahar IIBBda xizmat vazifasini bajarish chog‘ida halok bo‘lgan kichik serjant Hosilbek Eshnazarov xotirasiga bag‘ishlab yodgorlik majmuasi ochildi va uning oilasiga Toshkent shahridan uch xonali uy sovg‘a qilindi.

Qayd etilishicha, Hosilbekning oilasi, farzandlari, va ota-onasi hamisha davlat e’tiborida bo‘lib, ijtimoiy muhofazasi ta’minlab boriladi. Qashqadaryo viloyatining G‘uzor tumanidagi 62-maktabda esa Hosilbek uchun yodgorlik barpo etiladi.

Davlat rahbarining tashabbusi bilan Hosilbek Eshnazarov yuksak unvon “Jasorat” medali bilan mukofotlangandi. Tadbirda Ichki ishlar vaziri tomonidan ushbu medal Hosilbekning otasiga topshirilgan.

Eslatib o‘tamiz, joriy yil 25-fevral kuni Mirobod tumanida voyaga yetmagan Doniyor Turg‘unov avtomashinada yo‘l-patrul xizmati inspektori Hosilbek Eshnazarovni urib yuborgan edi. Sudning 28-fevral kungi ajrimi bilan gumonlanuvchi Turg‘unovga nisbatan “qamoqqa olish” tarzidagi ehtiyot chorasi qo‘llanilgan. 

• IIBB
• IIV
• YPX