Turkiyaning Izmir shahrida O‘zbekiston fuqarosi bilan bog‘liq hodisa yuz berdi. Bu haqda O‘zbekiston Respublikasining Istanbul shahridagi Bosh konsulxonasi rasmiy ma’lumot berdi.

Dastlabki ma’lumotlarga ko‘ra, Namangan viloyatidan bo‘lgan 22 yoshli fuqaro Sevdora Hakimjonova Izmir shahrida yashab kelayotgan vaqtida ko‘p qavatli turar-joy binosining to‘rtinchi qavatidan tushib ketgan. Hozirda u davlat shifoxonasida davolanmoqda. Shifokorlarning bildirishicha, ayolning ahvoli og‘ir.

Ma’lum qilinishicha, S.Hakimjonova Turkiya fuqarosi bilan imom nikohi asosida turmush qurgan, biroq nikoh rasmiy tartibda qayd etilmagan. Ma’lumotlarga ko‘ra, nikoh marosimi Chust tumanida o‘tkazilgan.

Keyinchalik er-xotin Turkiyaning Izmir shahriga ketib, kuyovning yaqin qarindoshlari bilan bir xonadonda yashab kelgan. Qayd etilishicha, turmush o‘rtog‘i ham Hakimjonova kabi eshitish va nutqida nuqsoni bo‘lgan shaxs hisoblanadi.

Mazkur holat yuzasidan Turkiya huquqni muhofaza qiluvchi organlari tomonidan jinoiy ish qo‘zg‘atilgan. Hozirda voqeaning barcha tafsilotlarini aniqlash maqsadida tergov harakatlari olib borilmoqda, to‘plangan materiallar prokuratura organlari tomonidan ko‘rib chiqiladi.

Diplomatik vakolatxona ma’lum qilishicha, vaziyat konsulxona nazoratiga olingan. Fuqaroning sog‘lig‘i holati hamda tergov jarayonlari bo‘yicha Turkiya vakolatli idoralari bilan hamkorlikda ish olib borilmoqda.

• Halokat
• Konsullik
• O‘zbekistonlik
• Turkiya
• fuqaro