Ozarbayjon va Rossiya tashqi ishlar vazirliklari qo‘shma bayonot bilan chiqib, 2024-yil dekabr oyida yuz bergan Ozarbayjon havo yo‘llari (AZAL) yo‘lovchi samolyoti halokati bo‘yicha barcha asosiy masalalar yuzasidan kelishuvga erishilganini ma’lum qildi.

Bayonotda qayd etilishicha, fojia oqibatlari bilan bog‘liq masalalar, jumladan tovon to‘lovlari ham tartibga solingan. Biroq kelishuv tafsilotlari ochiqlanmagan.

Tomonlar bu qadamni o‘zaro hamkorlik va ittifoqchilik munosabatlarini yanada mustahkamlashga qaratilgan harakat sifatida baholagan.

2024-yil 25-dekabr kuni Boku–Grozniy yo‘nalishida parvoz qilayotgan AZAL aviakompaniyasining Embraer E190 samolyoti Qozog‘istonning Oqtov shahri yaqinida halokatga uchragan. Hodisa oqibatida 38 kishi halok bo‘lgan, 29 kishi omon qolgan.

Keyinchalik Rossiya prezidenti Vladimir Putin samolyot Rossiya havo mudofaa tizimi tomonidan tasodifan urib tushirilganini tan olgan edi. Aviahalokatdan so‘ng Moskva va Boku o‘rtasidagi munosabatlarda sovuqlik kuzatilgan.