Eron hukumati AQSh bilan navbatdagi muzokaralar o‘tkazish bo‘yicha hozircha kelishuvga erishmaganini ma’lum qildi. Bu haqda xorijiy ommaviy axborot vositalari, jumladan Tasnim agentligi xabar berdi.

Xabarlarga ko‘ra, Tehron muzokaralar davom etishi uchun asosiy shart sifatida AQSh tomonidan qo‘yilayotgan “ortiqcha talablar”dan voz kechilishini talab qilmoqda.

Avvalroq Axios nashri AQSh va Eron o‘rtasidagi ikkinchi raund muzokaralari yaqin kunlarda Islomobodda bo‘lib o‘tishi mumkinligi haqida xabar bergan edi. Shuningdek, AQSh prezidenti Donald Tramp muzokaralar natijasida tez fursatda kelishuvga erishilishi mumkinligini bildirgan.

Tasnim agentligining ma’lum qilishicha, Eron tomoni AQShning qat’iy pozitsiyasi va qo‘shimcha talablari sababli hozircha yangi muzokaralar raundini ma’qullamagan.

Manbalarga ko‘ra, Tehron muzokaralar samarasiz bo‘lsa, ularni davom ettirishni maqsadga muvofiq emas deb hisoblamoqda.

Hozirda tomonlar o‘rtasida yangi uchrashuvni tashkil etish bo‘yicha vositachilar orqali muzokaralar davom etmoqda.