Respublikadagi banklardan birining Andijon viloyati bosh boshqarmasi boshlig‘i o‘rinbosari xizmat vakolatidan foydalanib, noqonuniy yo‘l bilan daromad orttirishga uringani aniqlandi.

Ma’lum bo‘lishicha, u kredit ta’minoti uchun garovga qo‘yilgan, Asaka tumanida joylashgan, umumiy qiymati 16,8 mlrd so‘mlik xususiy davolash markazining 4 qavatli binosini noqonuniy tarzda sotishga harakat qilgan. Ushbu mulk auksion savdolaridan qaytgach, mansabdor shaxs uning narxini 12 mlrd so‘mgacha pasaytirib, bank balansiga o‘tkazgan.

Shundan so‘ng, mazkur obyektni mahalliy tadbirkorga auksionsiz, 7 yil muddatga foizsiz kredit hisobidan olib berish evaziga 90 ming AQSh dollari miqdorida pora talab qilgan.

Davlat xavfsizlik xizmati tomonidan o‘tkazilgan tezkor tadbirda u 40 ming AQSh dollarini olayotgan vaqtida ashyoviy dalillar bilan ushlandi.

Hozirda mazkur holat yuzasidan jinoyat ishi qo‘zg‘atilgan bo‘lib, tergov harakatlari olib borilmoqda.

Agar kundalik hayotda shunga o‘xshash qonunbuzilish holatlariga duch kelsangiz, Davlat xavfsizlik xizmatining 1520 qisqa raqamiga murojaat qilishingiz mumkin. Murojaat qiluvchining shaxsi sir saqlanishi kafolatlanadi.