Qozog‘istonlik 22 yoshli yigit Birlashgan Arab Amirliklarida umrbod ozodlikdan mahrum etildi. Bu haqda Qozog‘iston Tashqi ishlar vazirligi ma’lum qildi.

Vazirlik xabariga ko‘ra, 2026 yil 18 mart kuni Dubayning birinchi instansiya sudi Qozog‘iston fuqarosini bir qator og‘ir jinoyatlarda aybdor deb topib, unga umrbod qamoq jazosi hamda jarima tayinlagan.

Yigitning yaqinlari uning 2024 yilda ishlash uchun Birlashgan Arab Amirliklariga ketgani va u yerda haydovchi bo‘lib ishlaganini aytmoqda. Qarindoshlari esa uning aybiga ishonmasliklarini, u tuhmat qurboni bo‘lishi mumkinligini bildirgan.

Alibek Bakaev, Qozog‘iston tashqi ishlar vaziri o‘rinbosarining aytishicha, hozircha yigitni ekstraditsiya qilish masalasi ko‘rib chiqilmayapti.

“Bu Dubay shahrining birinchi instansiya sudi qarori. Apellyatsiya shikoyati berilgan, tegishli tartiblar mavjud. Shu sababli hozircha ekstraditsiya haqida gap yo‘q. Avvalo butun sud jarayoni yakunlanishi kerak, shundan keyingina qaror qabul qilinadi”, — degan u.

Uning so‘zlariga ko‘ra, ish Birlashgan Arab Amirliklari qonunchiligiga muvofiq hal etiladi. Hozirda ushbu ish bilan advokatlar va Qozog‘istonning bosh konsulxonasi shug‘ullanmoqda.

“Dubaydagi bosh konsulxona zarur konsullik-huquqiy yordam ko‘rsatishda davom etmoqda. Masala vazirlik nazoratida”, — deya qo‘shimcha qilgan vazir o‘rinbosari.