“Eurovision” tashkilotchilari Rossiya nomzodlari bu yilgi tanlovda ishtirok etmasliklarini maʼlum qilishdi. Ushbu cheklov rossiyalik xonandalar bilan bir qatorda musiqiy guruhlarga ham tegishli.

“Ukrainadagi misli koʻrilmagan inqirozdan kelib chiqib, bu yili rossiyalik nomzodlarning ishtiroki tanlovning obroʻsiga putur yetkazishidan xavotirdamiz”, deyiladi tashkilotchilar tomonidan berilgan rasmiy bayonotda.

Rossiyaning tanlovdagi ishtirokini cheklash taklifi Finlandiyaning “Yle” teleradiokompaniyasi tomonidan berilgan. Shuningdek, finlandiyalik ijodkorlar agar tanlovda Rossiya nomzodi qatnashadigan boʻlsa, Finlandiya ishtirok etishdan bosh tortishini maʼlum qilgan.

Estoniyaning “ERR” milliy teleradiokompaniyasi ham aynan mana shunday pozitsiyada ekanligini bildirgan.

“Eurovision” tanlovi 1956-yildan beri har yili oʻtkazib kelinadi. 2015 yilda ishtirokchilar roʻyxatiga Avstraliya ham qoʻshilgan. 2022-yilda tanlovning final bosqichi Turin shahrida boʻlib oʻtadi.

• Madaniyat
• San’at
• Shou-biznes