Hukumatning mutaxassisligi bo‘yicha kamida besh yil mehnat stajiga ega bo‘lgan xotin-qizlarni oliy taʼlim muassasalariga to‘lov-kontrakt asosida o‘qishga qabul qilish tartibini tasdiqlash haqidaga qarori loyihasi eʼlon qilindi.

Unga ko‘ra, o‘qishga qabul qilish Oila va xotin-qizlar davlat qo‘mitasining tavsiyanomasi asosida mutaxassisligi bo‘yicha kamida besh yil mehnat stajiga ega bo‘lgan xotin-qizlar hisobidan, keyinchalik ushbu tizimda besh yil ishlab berish sharti bilan ish faoliyatiga mos bo‘lgan bakalavriat taʼlim yo‘nalishlariga test sinovlari natijalariga asosan amalga oshiriladi.

Mazkur tartib oliy harbiy va harbiylashtirilgan taʼlim muassasalariga, O‘zbekistonda faoliyat olib borayotgan xorijiy va nodavlat oliy taʼlim tashkilotlari hamda ularning filiallariga nisbatan tatbiq etilmaydi.

Tavsiyanoma mutaxassisligi bo‘yicha kamida besh yil mehnat stajiga ega, lekin oliy maʼlumotga ega bo‘lmagan xotin-qizlar uchun beriladi.

tavsiyanoma olish uchun talabgor xotin-qizlar doimiy yashash yoki vaqtincha ro‘yxatda turgan joyidagi tuman (shahar) oila va xotin-qizlar bo‘limlariga elektron shaklda har yili 1-maydan 1-iyunga qadar murojaat qiladi.

Tavsiyanoma Qo‘mitaning birinchi rahbari tomonidan, birinchi rahbar lavozimi vakant bo‘lganda yoki uning vazifalarini bajarish boshqa shaxsga yuklatilganda esa – ushbu rahbar tomonidan beriladi.

Xotin-qizlarga tavsiyanoma Qo‘mita tomonidan bir marta beriladi hamda tavsiyanoma berilgan kundan boshlab 3 yil muddatga amal qiladi.

Maʼlumot uchun, tavsiyanoma olish maqsadida murojaat etish uchun ariza shakli Qo‘mita tomonidan ishlab chiqiladi.

• OTM
• Qo‘mita
• Xotin-qizlar
• Yangilik
• xabar