Tailand Kambodja bilan chegaradagi to‘qnashuvlar sabab Trat provinsiyasida komendantlik soati joriy etdi. Bu haqda Reuters xabar bermoqda.

Kambodja bilan to‘qnashuvlar bahsli chegara hududining qirg‘oqbo‘yi mintaqalariga ham yoyildi. AQSh prezidenti Donald Tramp 12-dekabr kuni tomonlar o‘t ochishni to‘xtatishga rozi bo‘lganini aytganiga qaramay, vaziyat keskinligicha qolmoqda. Kambodja Tailand bilan chegaradagi barcha o‘tish punktlarini yopgan.

“Umuman olganda, Kambodja 13-dekabr kuni o‘t ochishni to‘xtatishga tayyorligini bildirganiga qaramay, to‘qnashuvlar uzluksiz davom etmoqda. Tailand diplomatik yechimga ochiq, ammo muzokaralar boshlashdan oldin Kambodja birinchi navbatda dushmanlik harakatlarini to‘xtatishi kerak”, – dedi Tailand Mudofaa vazirligi matbuot kotibi kontr-admiral Surasant Kongsiri.

​

Tailand harbiylari 13-dekabr kuni Kambodja og‘ir qurollar yetkazishda foydalangan ko‘prikni vayron qilgani hamda Koh Kong provinsiyasidagi artilleriya nishonlariga qarshi operatsiya boshlaganini ma’lum qildi. Kambodja esa Tailandni fuqarolik infratuzilmasiga zarba berishda aybladi.

Komendantlik soati Koh Kong bilan chegaradosh Trat provinsiyasining besh tumanida amal qiladi. Koh Chang va Koh Kood sayyohlik orollari bundan mustasno. Avvalroq Tailandning sharqidagi Sakeo provinsiyasida ham komendantlik soati joriy etilgan, u hanuz kuchda.

Tailand va Kambodja 8-dekabrdan beri 817 kilometrli chegara bo‘ylab bir nechta nuqtalarda og‘ir qurollardan o‘q almashmoqda. Bu iyul oyida Tramp va Malayziya vositachiligida yakunlangan besh kunlik to‘qnashuvlardan beri eng shiddatli janglar hisoblanadi.

Tramp 12-dekabr kuni Tailandning muvaqqat bosh vaziri Anutin Charnvirakul va Kambodja bosh vaziri Hun Manet bilan suhbatlashib, tomonlar “barcha otishmalarni to‘xtatishga” kelishib olganini aytdi. Biroq 13-dekabr kuni Anutin “yerimiz va xalqimizga tahdidlar tugamaguncha kurashni davom ettiramiz”, – deya bayonot berdi.

• Chegara
• Kambodja
• Tailand