DXXning Toshkent shahar va Andijon viloyati bo‘yicha boshqarmalari xodimlari tomonidan o‘tkazilgan tezkor tadbirda uy sharoitida qalbaki pullarni tayyorlash va muomalaga kiritish bilan shug‘ullangan shaxs aniqlangan.

Qayd etilishicha, Asaka tumanida yashovchi, 1987-yilda tug‘ilgan, avval firibgarlik bilan bog‘liq jinoyat uchun sudlangan fuqaro jami 297 million so‘mlik qalbaki pullarni 148 million so‘mga sotayotgan vaqtida ashyoviy dalillar bilan ushlangan.

Tezkor tadbir davomida uning yashash xonadonlari ham ko‘zdan kechirilgan. Natijada qalbaki banknotlar tayyorlashda foydalanilgan kompyuter, printer, A4 hajmdagi maxsus qog‘ozlarga chop etilgan yarim tayyor 50 va 100 ming so‘mlik kupyuralar hamda qog‘oz kesuvchi uskunalar aniqlanib, protsessual tartibda olib qo‘yilgan.

Holat yuzasidan DXX Toshkent shahar bo‘yicha boshqarmasi tomonidan fuqaro va boshqalarga nisbatan Jinoyat kodeksining 176-moddasi 3-qismi “a” bandi bilan jinoyat ishi qo‘zg‘atilgan. Tergov doirasida uning jinoiy aloqalarini aniqlash bo‘yicha zarur chora-tadbirlar amalga oshirilmoqda.