BBC xabar berilishicha, AQShning immigratsiya va bojxona xizmati (ICE) xodimi Minneapolisda o‘tkazilgan reyd vaqtida 37 yoshli AQSh fuqarosi bo‘lgan ayolni otib o‘ldirgan.

AQSh Ichki xavfsizlik vazirligi ayol ICE agentlarini mashina bilan bosib ketishga uringanini, shu sababli xodimlardan biri uni “o‘zini himoya qilish maqsadida” otganini bildiradi. Prezident Donald Tramp ham ushbu versiyani qo‘llab-quvvatlagan.

CNN bosh tahlilchisi Jon Miller esa halok bo‘lgan ayolning avtomobili g‘ildiraklari ofitserlardan chetga burilgan holatda bo‘lganini ta’kidlab, bu rasmiylarning bayonotiga zid ekanini aytdi.

NYT’ning yozishicha, ushbu hodisadan keyin Minneapolisda mingdan ortiq odam ishtirokida norozilik namoyishlari boshlangan. Bundan tashqari, Nyu-Yorkda taxminan 400 kishi ICE ofisi oldida norozilik bildirmoqda.

Minneapolis meri matbuot anjumanida bu holatni “mas’uliyatsizlik” deb atab, ICE ni shahardan chiqib ketishga chaqirgan.

Associated Press agentligining ta’kidlashicha, bu Tramp ma’muriyatining immigratsiya kampaniyasi oqibatida odamlar halok bo‘lgan kamida beshinchi holatdir.

• AQSh
• Bayonot
• Migratsiya
• Tramp