Oxirgi besh yilda avtomobillarga o‘rnatilgan ballonlarining portlashi bilan bog‘liq vaziyatlar oqibatida 23 nafar fuqaro vafot etgan va 20 ta fuqaro og‘ir tan jarohatlari olgan. Bu haqda FVV Bug‘ qozonlari, ko‘tarish inshootlari va putur yetkazmaydigan nazoratda sanoat xavfsizligi inspeksiyasi mas’ul xodimi Jamshid Usmonov ma’lum qildi.

Xususan, 2021-yilda gaz balloni portlashi bilan bog‘liq 14ta holat qayd etilgan. Bunda 1 kishi yengil tanjarohati, 10 kishi esa og‘ir tan jarohati olgan. O‘lim bilan bog‘liq 14ta holat rasmiylashtirilgan.

Qayd etilishicha, tahlillarga ko‘ra avtomobil ballonlarining portlashiga quyidagilar sabab bo‘lmoqda:

– sifatsiz (metallokompozit) ballonlardan foydalanish;

– ballonlarni ishlab chiqarish jarayonida texnologik kamchiliklar;

– avtomobillarga ballonlarni o‘rnatish va sinov ishlarining sifatsizligi;

– avtomobillarga siqilgan gaz quyishda ruxsat etilganidan ortiqcha bosimda gaz quyilishidir.

Ma’lum bo‘lishicha, hozirgi kunda mamlakatda tadbirkorlik sub’yektlari tomonidan qurilgan 1200 dan ortiq avtomobillarga gaz to‘ldirish kompressor shoxobchalari (AGTKSh) va 800 dan ortiq avtomobillarga suyultirilgan gaz quyish shoxobchalari (AGQSh) faoliyat ko‘rsatmoqda. Shu bilan birga, gaz ballonlarini ishlab chiqaruvchi bir nechta  tashkilot mavjud.

Shuningdek, 2022-yilga qadar 1 mln 570 mingdan dan ortiq avtotransport vositalarida 2,5 mln dan ortiq metan gaz va 200 000 dan ortiq avtotransport vositalarida suyultirilgan gaz yoqilg‘isida ishlashga moslashtirilgan gaz ballonlari o‘rnatilgan.

• Avtomobil
• FVV
• Gaz