O‘zbekistonning BAAdagi Bosh konsulxonasi aviaparvozlar bekor qilingani sababli Dubay, Sharja va Abu-Dabi shaharlaridan vatanga qayta olmayotgan fuqarolar mehmonxonalarga joylashishda yordam berdi. Bu haqda “Dunyo” agentligi xabar qildi.

2-mart holatiga ko‘ra, Dubaydagi Hyatt Place Dubai mehmonxonasiga jami 93 nafar o‘zbekistonlik joylashtirildi. Ularning 61 nafari ushbu mehmonxonaning o‘zidan chiqarib yuborilgan fuqarolar bo‘lib, vaqtinchalik turar joy masalasida qiyin ahvolga tushib qolgan edi. 27 nafar fuqaro Floria Hotel mehmonxonasidan chiqarib yuborilgan bo‘lib, ular ham joylashtirilgan. Ko‘chada qolib ketgan 5 nafar o‘zbekistonlik ham aniqlanib, xavfsiz joyga ko‘chirildi. Bundan tashqari, Hampton by Hilton Dubai mehmonxonasiga 39 nafar fuqaro joylashtirilib, ularning yashash sharoitlari ta’minlagan.

Shuningdek, Abu-Dabi shahrida og‘ir ijtimoiy ahvolga tushib qolgan 4 nafar fuqaro AG Hotel Abu Dhabi mehmonxonasiga joylashtirilib, ularning salomatligi va xavfsizligi alohida nazoratga olingan.

“Hozirgi vaqtda barcha fuqarolarimizga zarur amaliy va tashkiliy yordam ko‘rsatilmoqda. BAAdagi O‘zbekistonning diplomatik vakolatxonalari va mutasaddi tashkilotlar tomonidan vaziyat doimiy ravishda monitoring qilinib, har bir murojaat tezkor tarzda ko‘rib chiqilmoqda”, – deyiladi xabarda.

• BAA
• O‘zbekistonlik