Qozog‘istonning Mang‘istov hududida kuzatilgan kuchli yog‘ingarchiliklar jiddiy oqibatlarga olib keldi — yuzdan ortiq ot nobud bo‘ldi.

Ma’lum qilinishicha, jala yomg‘irlardan keyin hayvonlar sho‘rxok va botqoq hududlarga tushib qolgan. Natijada ularning ko‘pchiligi loyga botib halok bo‘lgan, ayrimlari esa hanuz chiqib keta olmayapti.

Mahalliy aholi ijtimoiy tarmoqlarda og‘ir vaziyat haqida yozib, deyarli har bir xonadon bir nechtadan o‘ntagacha chorvasidan ayrilganini bildirgan.
“Yomg‘irdan keyin chorva suv oqimi bilan oqib ketib, sho‘rxok joylarga tushib qoldi. Ko‘plab otlar loyga botib nobud bo‘ldi. Hali ham chiqolmayotganlari bor. Agar tez yordam berilmasa, vaziyat yanada og‘irlashadi”, — deya yozadi aholi vakillari.

Rasmiylarga ko‘ra, 14–15 aprel kunlari kuzatilgan noqulay ob-havo oqibatlari hozirda bartaraf etilmoqda. Sayotes qishlog‘i atrofida va temiryo‘l bo‘ylab chorva nobud bo‘lgan hududlar aniqlangan.

Holatni o‘rganish uchun maxsus komissiya tuzilgan. Dastlabki ma’lumotlarga ko‘ra, yuzdan ortiq ot topilgan, ammo aniq raqamlar hali hisoblab chiqilmoqda.

Mutaxassislar bu holatga kuchli shamol va jala yomg‘ir sabab bo‘lganini aytmoqda. Yo‘ldan adashgan hayvonlar uzoq va yetib borish qiyin hududlarda qolib ketgan. Ayrim podalar esa aholi yashash joylaridan 60–80 kilometr uzoqlikda nobud bo‘lgan bo‘lishi mumkin.

Qidiruv ishlari dronlar yordamida olib borilmoqda. Maxsus shtab tashkil etilib, yirik korxonalar texnikasi ham jalb qilingan.
Rasmiylar barcha kuch va vositalar safarbar etilganini, vaziyat nazorat ostida ekanini ma’lum qildi.
Eslatib o‘tamiz, avvalroq ushbu hududda Kaspiy dengizi qirg‘og‘ida 191 ta o‘lik tyulen topilgani ham xabar qilingandi.