AQShning sobiq prezidenti Barak Obama “Eng yaxshi hikoyachi” nominatsiyasida “Emmi” mukofotini qoʻlga kiritdi. Obama “Dunyoning eng yaxshi milliy bogʻlari” hujjatli serialini ovozlashtirish jarayonida ishtirok etgan.

Serial Netflix platformasiga joylashtirilgan. Barak Obama nufuzli mukofotga “Moʻjizalar dunyosi” epizodidagi roli uchun munosib deb topilgan.

5 ta seriyadan iborat boʻlgan mazkur loyiha AQSh, Indoneziya, Keniya, Chili va boshqa mamlakatlarda joylashgan milliy bogʻlar tabiati haqida suratga olingan. Obamaga tegishli boʻlgan “Higher Ground Productions” kompaniyasi serialga prodyuserlik qilgan.

Bu sobiq prezidentning media yoʻnalishidagi birinchi mukofoti emas. Siyosatchi oʻz vaqtida “Otamning orzulari” va “Umid jasorati” memuar audiokitoblari uchun “Gremmi” mukofotini ham qoʻlga kiritgan.

• AQSh
• Mukofot
• mashhurlar