Turkiy xalqlarning asrlar davomida saqlanib kelayotgan do‘stligi va hamjihatligi mushtarak tarix, til, madaniyat hamda qadriyatlar bilan chambarchas bog‘liq. Bugungi globallashuv davrida ham ushbu rishtalar nafaqat saqlanib qolmoqda, balki yangi mazmun bilan boyib, yanada mustahkamlanib bormoqda.

Andijonning 2026-yilda turkiy dunyoning madaniyat poytaxti deb e’lon qilinishi nafaqat viloyat, balki butun O‘zbekistonning xalqaro madaniy maydondagi nufuzini oshirishga xizmat qilmoqda. Mazkur nufuzli maqom doirasida tashkil etilayotgan tadbirlar turkiy xalqlar o‘rtasidagi tarixiy, madaniy va ma’naviy rishtalarni yanada mustahkamlashga qaratilgani bilan ahamiyatlidir.

Xususan, 25-iyun kuni Farg‘ona viloyatidagi Islom Karimov nomidagi teatr va konsert saroyida bo‘lib o‘tgan “Vodiydan Turon sadosi” xalqaro gala-konserti ana shunday yirik madaniy tadbirlardan biri bo‘ldi. Tadbir “Andijon – 2026 yilda turkiy dunyoning madaniyat poytaxti” dasturining tantanali ochilish marosimi doirasida tashkil etildi.

Gala-konsertda O‘zbekiston, Ozarbayjon, Qozog‘iston, Qirg‘iziston, Turkmaniston va Turkiyadan tashrif buyurgan san’atkorlar, folklor jamoalari hamda raqs ansambllari ishtirok etib, turkiy xalqlarning boy madaniy merosi, mushtarak qadriyatlari va san’atdagi yaqinligini namoyish etdi.

TURKSOY Bosh kotibi o‘rinbosari Sayit Yusuf so‘zga chiqib, turkiy xalqlarni birlashtirib turuvchi umumiy tarix, til va madaniyat xalqlar o‘rtasidagi do‘stlik hamda hamjihatlikni mustahkamlashda muhim o‘rin tutishini ta’kidladi. Uning qayd etishicha, bunday madaniy loyihalar nafaqat san’atni targ‘ib qiladi, balki qardosh xalqlar o‘rtasidagi o‘zaro hamkorlikni yangi bosqichga olib chiqadi.

Botir Ergashevning “Turkiylar” she’ri asosida sahnalashtirilgan badiiy chiqish bilan boshlandi. Shundan so‘ng turli mamlakatlardan kelgan folklor va raqs jamoalari ishtirokidagi musiqiy-xoreografik kompozitsiyalar tomoshabinlarga bayramona kayfiyat ulashdi.

O'zbek milliy san’atining yorqin namunalari bilan bir qatorda, qardosh davlatlar ijodkorlarining chiqishlari ham namoyish etildi. Qozog‘istonning “Saukele”, Turkmanistonning “Melegush” va “Kushdebti”, Turkiyaning “Halay” hamda “Karadeniz” raqslari, shuningdek, turli davlatlar folklor jamoalarining chiqishlari tomoshabinlarda katta taassurot qoldirdi.

 “Andijon – 2026” loyihasi nafaqat madaniy almashinuvni kengaytirish, balki turizm salohiyatini oshirish, hududning xalqaro imijini mustahkamlash va O‘zbekistonning boy madaniy merosini jahon miqyosida targ‘ib etishda ham muhim omil bo‘lib xizmat qiladi.