So‘nggi paytlarda ko‘p kuzatilayotgan ayol-qizlarga nisbatan zo‘ravonlik aslida og‘ir gunohdir. Bu haqda
Musulmonlar idorasi raisining birinchi o‘rinbosari Homidjon domla Ishmatbekov fikr bildirdi.
“Jamiyatimizda erkaklar kuch-qudrat egasi ekanini qaysidir darajada suiste’mol qilib, huzurlaridagi zaifalarga nisbatan mana shunday tazyiq o‘tkazayotgan holatlar uchrab turibdi. Agar biz buni vaqtida muolaja qilmasak, ayollarning haq-huquqi naqadar yuksak ekanini, dinimiz ularga izzat-ikrom ko‘rsatish naqadar savobli ish ekanini bayon qilmasak, aksincha, ularga ziyon yetkazish ertaga qiyomatda zulmat bo‘lishligini aytmas ekanmiz, shu ishlarga qo‘l urayotgan kishilar bu dunyoda ham, oxiratda ham juda ko‘p azob va ofatlarga mubtalo bo‘ladi”, — deydi domla.
Uning qayd etishicha, ayollar, kim bo‘lishidan qat’i nazar, ularga hurmat-ehtirom ko‘rsatish zarur. Har bir ayol e’zozlanishi, asrab-avaylanishi kerak.
“Dinimiz ayollarga bo‘lgan hurmati, u kim bo‘lishidan qat’i nazar, onasi bo‘lsa, bosh ustiga, jufti haloli bo‘lsa, uni e’zozlashi, mehr berishi uning vazifasi, shu sababli uni nikohiga olgan. Opa-singillari bo‘lsa, bu uning jigarlari, silayi-rahm shuni taqozo qiladi. Yaqin qarindoshlari bo‘lsa, ularga hurmat-e’tibori, ammo boshqa begona bo‘lsa ham, u mo‘mina-muslima bo‘lsa, dindoshlik haqi bor, g‘ayridin bo‘lsa, insonlik, zaifalik haqi bor.
Biz hozir o‘z qaramog‘imizdagilarning aziyat chekayotganini ko‘ryapmiz, eshityapmiz, o‘qiyapmiz. Bu bedodlik, buning ortidan ertaga boshqa kulfatlar kelishi mumkin. Bir insondan sodir bo‘lgan gunoh tufayli jamiyatda qancha-qancha yaxshiliklar bo‘lmay qo‘yadi. Biz bilmagan joyda bir zaifa ozor chekayotgandir. Ana shu tufayli biz yaxshiliklardan mahrum bo‘lmaylik. Biz barcha zaifalarni o‘zimizning qaramog‘imizdagilar bilan teng ko‘raylik”, — deya ta’kidlaydi Musulmonlar idorasi raisining birinchi o‘rinbosari Homidjon domla Ishmatbekov.
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!