Tailandning Chiangmay shahrida boks bo‘yicha kattalar o‘rtasidagi Osiyo chempionati o‘z yakuniga yetib bormoqda.

Bugun musobaqada ayollar o‘rtasidagi final bahslari o‘tkazildi va unda yetti nafar O‘zbekiston vakilalari ishtirok etdi.

Dastlab, -48 kg vazn toifasida O‘zbekiston sharafini himoya qilgan Farzona Fozilova Vyetnam vakilasi Lin Chi Ngoga qarshi ringga ko‘tarildi va 4:1 hisobida g‘alaba qozonib, kattalar o‘rtasidagi Osiyo chempioniga aylandi.

-52 kg vazn toifasida bahslarga kirishgan Feruza Kazakova ukrainalik Svitlana Umanskaga qarshi jang o‘tkazdi hamda O‘zbekiston uchun chempionatdagi ikkinchi oltinni ishlab berdi.

-54 kg vazn toifasida ringga ko‘tarilgan JCh sovrindori Aziza Yoqubova finalda mezbon bokschi, Tailand vakilasi Natnicha Chongprongklangga qarshi 1:4 hisobida imkoniyatni boy berdi va musobaqaning kumush medaliga sazovor bo‘ldi.

 -57 kg vazn toifasida O‘zbekiston sharafini himoya qilayotgan Nigina O‘ktamova ham finalda mezbon bokschi Punravi Ruyenrosga qarshi jang o‘tkazib, 5:0 hisobidagi imkoniyatni boy berdi va kumush medal bilan kifoyalandi.

-66 kg vazn toifasida Navbahor Hamidova Xitoy vakilasi Xuiping Yuanga qarshi jangda 4:1 hisobida g‘alaba qozondi va Osiyo chempionatining oltin medalini qo‘lga kiritdi.

-75 kg vazn toifasida oltin medal uchun da’vogarlik qilgan Aziza Zokirova finalda Xitoy vakilasi Lina Vangga 5:0 hisobida mag‘lub bo‘ldi va kumush medal bilan cheklandi.

Final bahslardagi so‘nggi O‘zbekiston vakilasi +81 kg vazn toifasida Oltinoy Sotimboyeva finalda qozog‘istonlik bokschi Yeldana Talipovaga qarshi jang qildi va u ham to‘liq davom etgan jangda 1:4 hisobida imkoniyatni boy berib, musobaqaning kumush medali egasiga aylandi.

Shu tariqa, O‘zbekiston ayollar terma jamoasi Osiyo chempionatini 3 ta oltin, 4 ta kumush va 2 ta bronza medallari bilan yakunlashdi.

Eslatib o‘tamiz, ertaga chempionatning erkaklar o‘rtasidagi final janglari bo‘lib o‘tadi, unda 10 nafar O‘zbekiston vakili chempionlik uchun ringga ko‘tariladi.

• Ayollar
• Boks
• Osiyo Chempionati