Pixar kompaniyasi kreativ direktori va “Boshqotirma” animatsion filmining muallifi Pit Dokter Entertainment Weekly nashriga bergan intervyusida mazkur franshiza asosida animatsion serial suratga olinayotganini ma’lum qildi.

Dokterning so‘zlariga ko‘ra, loyiha ustidagi ishlar deyarli nihoyasiga yetgan va multserial 2025-yilning bahorida Disney+ da namoyish etiladi.

Yangi serial “Dream Production”, ya’ni “Tushlar studiyasi” deb nomlangan. Serialda Rayli Andersonning miyasida uning orzularini ro‘yobga chiqaradigan kinostudiya haqida hikoya qilinadi.

“Biz tushlarning ongimizdagi o‘rni va ular uyg‘onganimizda bizga qanday ta’sir qilishini o‘rganishni davom etdik. Ushbu loyiha muvaffaqiyatli bo‘lishiga ishonamiz”, - dedi Pit Dokter.

Eslatayib o‘tamiz, “Boshqotirma-2” premyerasi AQShda 13-iyun kuni bo‘lib o‘tdi. Mutaxassislarning fikricha, filming ikkinchi qismi bir qator kassa ko‘rsatkichlari bo‘yicha “Dyuna-2” va “Barbi”ni ortda qoldirdi. “Boshqotirma-2” jahon kinoprokatida 133 million dollardan ortiq daromad keltirdi.

• Multfilm
• Premyera