Buxoro viloyati IIB bergan xabarga ko‘ra, viloyat hududida fohishalik bilan shug‘ullanib, 40 ga yaqin kishiga OITS kasalligini qasddan yuqtirgan ayol qo‘lga olindi.

Qayd etilishicha, ayol 2017-yilda OITS kasalligiga chalingan va o‘sha vaqtning o‘zida dispanser nazoratiga olingan. Shuningdek, tegishli tartibda kasallikni boshqalarga yuqtirmaslik haqida ogohlantirilgan.

Ammo, u kasal holida begona erkaklar bilan jinsiy aloqada bo‘lib kelgan. U kasallikni yuqtirgan 40 nafarga yaqin erkaklarning aksariyati oilali bo‘lib, ular o‘z navbatida turmush o‘rtoqlariga ham bu kasallikni “tashib o‘tgan”.

– Do‘stlarim bilan kafeda o‘tirganimizda, ro‘paramizda o‘tirgan ikki nafar qiz bilan tanishib qolgandik. U paytda biz mast bo‘lganmiz. Ular bilan jinsiy aloqa ham qilganmiz. Shundan keyin telefon orqali gaplashib, aloqa qilib turdik. Keyinroq men u qizlarni OITSga chalinganini eshitib qoldim. So‘ng tibbiy ko‘rikka bordim. Shunda men ham bu kasallikni yuqtirib olganimni bildim. Turmush o‘rtog‘im homilador. Homilasi 6 oylik. Qilgan ishimdan juda pushaymonman. Ammo, afsuski, endi kech, – deydi ayolning sobiq mijozlaridan biri. 

Mazkur holat yuzasidan Buxoro viloyati IIB tergov bo‘limi tomonidan Jinoyat kodeksining 113-moddasi (Tanosil yoki OIV kasalligi/OITSni tarqatish)ning 4-qismi bilan jinoyat ishi qo‘zg‘atilgan. Yakunda jinoyat ishi ayblov xulosasi bilan sudga oshirilgan.

Mazkur shaxs sud hukmiga ko‘ra, 6 yil 6 oy muddatga ozodlikdan mahrum qilindi.

• Buxoro
• Fohishabozlik
• IIB
• OITS